Almatyda S. Asfendıarov atyndaǵy Qazaq ulttyq medısına ýnıversıtetiniń birinshi kýrs stýdentteriniń qatysýymen "Jarqyn bolashaq" qalalyq profılaktıkalyq forýmy ótti, - dep habarlaıdy Alnews Polisia.kz-ke silteme jasap.
İs-sharany Almaty qalasy polısıa departamentiniń esirtki qylmysyna qarsy is-qımyl basqarmasy, Qazaqstan Respýblıkasy İshki ister mınıstrligi, S. Asfendıarov atyndaǵy QazUMÝ, Almaty qalasy boıynsha Ekonomıkalyq tergep-tekserý departamenti jáne qalalyq Jastar saıasaty basqarmasy birlesip uıymdastyrdy.
Forým barysynda stýdentterge ınternet pen messendjerler arqyly jastardy esirtkiniń zańsyz aınalymyna tartýdyń zamanaýı tásilderi túsindirildi. Sonymen qatar mundaı qylmystar úshin kózdelgen jaýapkershilik, dropperlik, ınternet-alaıaqtyq, oıynǵa táýeldilik jáne ózge de sıfrlyq qaýipterdiń aldyn alý máseleleri qozǵaldy.
Kezdesýde jastardy qylmystyq áreketke tartý belgilerin der kezinde tanyp, quqyqqa qaıshy kontentke qaýipsiz ári saýatty áreket etýdiń mańyzyna erekshe nazar aýdaryldy. Qatysýshylarǵa profılaktıkalyq beınematerıaldar kórsetilip, ashyq formatta suraq-jaýap uıymdastyryldy.
Forým polısıa men jastar arasyndaǵy tikeleı baılanysty nyǵaıtyp, ózekti máselelerdi ashyq talqylaýǵa múmkindik beretin mańyzdy alańǵa aınaldy. İs-sharanyń negizgi maqsaty – jastardyń quqyqtyq saýattylyǵyn arttyrý, jaýapty minez-qulyq mádenıetin qalyptastyrý jáne qylmystyq árekettiń kez kelgen túrine jol bermeý ustanymyn nyǵaıtý.
