Almatyda segiz qala kóshesi men Tuńǵysh Prezıdent saıabaǵyn keshendi kórkeıtý jumystary jalǵasyp keledi, - dep habarlaıdy alnews.
Jobalar Sátbaev, Rozybakıev, Jarokov, Tımırázev, Jandosov, Masanchı kóshelerinde, sondaı-aq Seıfýllın jáne Abaı dańǵyldarynda júzege asyrylyp jatyr. Aýmaqtardyń jalpy uzyndyǵy shamamen 34 shaqyrym.
Kórkeıtý jumystary aýmaqtardy qasbetten qasbetke deıin jańartýdy qamtıdy. Atap aıtqanda, trotýarlar men júrginshi aımaǵyn salý, kógaldandyrý, avtomatty sýarý júıesin ornatý, syrtqy jaryqtandyrý men ınjenerlik jelilerdi jańǵyrtý, shaǵyn sáýlet nysandaryn ornalastyrý, sondaı-aq balalar jáne sport alańyn salý kózdelgen.
Qazirgi ýaqytta nysandarda júrginshi ınfraqurylymyn, ınjenerlik jeliler men syrtqy jaryqtandyrý júıesin salý jáne kógaldandyrý jumystary jalǵasyp jatyr. Joba aıasynda 4 357 aǵash jáne 795 myńǵa jýyq buta egý josparlanǵan. Jasyl jelekti kútip ustaý úshin jalpy uzyndyǵy shamamen 1 012 shaqyrym bolatyn avtomatty sýarý júıesi salynady.
Sonymen qatar 60-qa jýyq balalar jáne sport alańyn salý, velosıped ınfraqurylymyn damytý qarastyrylǵan. Jobalar aıaqtalǵannan keıin osy ýchaskelerdegi velojolaqtardyń uzyndyǵy 10 shaqyrymnan astamǵa artyp, 7,21 shaqyrymnan 17,77 shaqyrymǵa deıin ulǵaıady.
Qoǵamdyq keńistikterge de erekshe nazar aýdarylyp otyr. Sátbaev kóshesin kórkeıtý aıasynda aýmaǵy 6,9 gektar Respýblıka alańy qaıta jańǵyrtyldy. Munda 277 aǵash jáne 32,6 myńnan astam buta egilip, 550 metr velojolaq salyndy.
Tımırázev kóshesinde aýmaǵy 0,37 gektar «Atakent» kesheni aldyndaǵy alań jańartyldy. Munda 67 aǵash jáne 17,2 myńnan astam buta egilip, 100 metr velojolaq salyndy.
Rozybakıev kóshesinde Qarasaı batyr men Jambyl kósheleriniń aralyǵynda, sondaı-aq taǵy segiz aýmaqta jelilik saıabaqtar qurý kózdelgen.
Tuńǵysh Prezıdent saıabaǵyn kóriktendirý de iri jobalardyń biri bolyp qala beredi. Munda keshendi kógaldandyrý, aǵash, buta men gúl daqyldaryn qosa alǵanda, 1 mln-ǵa jýyq jasyl jelek egý, sondaı-aq úsh sý qoımasy bar avtomatty sýarý júıesin qurý josparlanǵan.
