Almaty belsendi demalys pen sportty unatatyndardyń ǵana emes, álemdik gastronomıa ókilderiniń de nazaryn aýdaryp keledi, - dep habarlaıdy alnews.
Almaty Open ATP 250 halyqaralyq tenıs týrnıri aıasynda qalaǵa Fransıadaǵy Michelin juldyzynyń úsh márte ıegeri atanǵan eń jas aspaz Faben Ferre keldi.
Sapar barysynda tanymal aspaz týrnırdiń qurmetti qonaqtaryna arnap avtorlyq taǵam daıyndap, óziniń gastronomıalyq ustanymyn tanystyrdy. Sondaı-aq Almaty Open týrnıriniń machtaryn tamashalap, qalamen tanysty.
Faben Ferreniń nazaryn jergilikti ónimder men olardyń zamanaýı asúıde qoldaný múmkindikteri aýdardy. Onyń pikirinshe, Almatyda erekshe dámi bar taǵamdar ázirleýge qajetti ónimder jetkilikti. Sondaı-aq fransýz aspazy qala turǵyndarynyń qonaqjaılyǵyna joǵary baǵa berdi. Aıta keteıik, bul – onyń Almatyǵa ekinshi sapary.
Faben Ferre Qazaqstannyń gastronomıalyq týrızmdi damytýǵa zor múmkindigi bar el ekenine toqtaldy. Onyń aıtýynsha, elimizde jergilikti ónimder men ulttyq asqananyń ózindik erekshelikterine negizdelgen derbes gastronomıalyq baǵytty qalyptastyrýǵa barlyq alǵyshart bar.
Almaty meıramhanalary da halyqaralyq deńgeıde tanylyp keledi. Qaladaǵy birqatar meıramhana The World’s 50 Best Discovery, La Liste jáne WHERETOEAT INTERNATIONAL reıtıńterine enip, Tatler Best Kazakhstan syılyǵymen marapattalǵan. Álemge tanymal aspazdardyń Almaty gastronomıasyna qyzyǵýshylyq tanytýy qalanyń halyqaralyq týrısik kartadaǵy ornyn nyǵaıtýǵa jáne ony jańa qyrynan tanytýǵa jol ashady.
