Almaty oblysynyń Qarasaı aýdanynda respýblıkalyq mańyzy bar Almaty – Bishkek avtomobıl jolynyń 19–27 shaqyrym aralyǵyn qaıta jańǵyrtý jáne keńeıtý jumystary bastaldy, - dep habarlaıdy alnews.
Joba Memleket basshysy Qasym-Jomart Toqaevtyń kólik ınfraqurylymyn damytý jáne avtomobıl joldarynyń ótkizý qabiletin arttyrý jónindegi tapsyrmasyn oryndaý aıasynda júzege asyrylýda.
İs-sharaǵa Almaty qalasy ákiminiń birinshi orynbasary Almasqan Smatlaev, Almaty oblysy ákimdiginiń, «QazAvtoJol» UK» AQ, Qarasaı aýdany ákimdiginiń, merdiger uıymdardyń jáne buqaralyq aqparat quraldarynyń ókilderi qatysty. Jobanyń tehnıkalyq parametrlerimen tanysqannan keıin qurylys tehnıkasy jer jumystaryna kiristi.
Qaıta jańǵyrtylatyn jol ýchaskesi respýblıkalyq jol jelisindegi eń qarqyndy qozǵalys júretin baǵyttardyń biri sanalady. Bul jolmen táýligine 70 myńnan astam avtokólik qatynaıdy. Qazirgi tórt jolaqty joldyń ótkizý qabileti jetkiliksiz bolǵandyqtan, kólik keptelisi jıi týyndap, qozǵalys jyldamdyǵy tómendeıdi jáne Almaty qalasy men qala mańyndaǵy eldi mekender arasyndaǵy kólik baılanysyna keri áserin tıgizýde.
«Almaty – Bishkek avtojoly tek qala úshin ǵana emes, búkil Almaty aglomerasıasy úshin strategıalyq mańyzy bar baǵyt. Joldy keńeıtý onyń ótkizý qabiletin arttyryp, jol júrý ýaqytyn qysqartady, sondaı-aq júrgizýshiler men jolaýshylar úshin qaýipsiz ári jaıly jaǵdaı qalyptastyrady», – dedi Almasqan Smatlaev.
Joba aıasynda joldyń júris bóligi tórt jolaqtan segiz jolaqqa deıin keńeıtiledi. Sonymen qatar, «taǵa» úlgisindegi eki jolaıryq, toǵyz jerústi júrginshiler ótkeli salynyp, jol boıyna trotýarlar men zamanaýı syrtqy jaryqtandyrý júıesi ornatylady. Budan bólek, gaz qubyrlary, sýmen jabdyqtaý, elektrmen jabdyqtaý jáne baılanys jelileri qaıta jańartylyp, jolǵa jańa kúrdeli úlgidegi jabyn tóseledi. Joba 2026 jyldyń sáýir aıynda memlekettik saraptamanyń oń qorytyndysyn aldy.
«Bul jol ýchaskesin jańǵyrtý – Almatynyń kólik júıesin keshendi damytý jumystarynyń bir bóligi. Qazirgi ýaqytta qalada Úlken Almaty aınalma avtomobıl jolyna deıin sozylatyn alty radıaldy jol men jeti magıstraldyq kósheni salý jáne uzartý jumystary jalǵasýda. Sonymen qatar metro, LRT jáne SkyTrain júıeleri qatar damytylyp jatyr», – dedi Almasqan Smatlaev.
Jobany iske asyrý nátıjesinde Almaty qalasyna kireberis jáne shyǵaberis baǵyttardaǵy kólik júktemesin azaıtý, jol qozǵalysy qaýipsizdigin arttyrý jáne qala men qala mańyndaǵy eldi mekender arasyndaǵy kólik qatynasyn jaqsartý kózdelip otyr. Sonymen qatar joba Qazaqstan men Qyrǵyzstandy baılanystyratyn halyqaralyq kólik dálizin damytýǵa, saýda-ekonomıkalyq baılanystardy nyǵaıtýǵa jáne elimizdiń tranzıttik áleýetin arttyrýǵa yqpal etedi.
