Qasym-Jomart Toqaev «Qazmedıa» ortalyǵynda respýblıkalyq referendým aıasyndaǵy úgit-nasıhat naýqanyna belsendi qatysqan jastarmen kezdesti, - dep habarlaıdy Aqorda.
Prezıdent búgin tarıhı kún ekenin atap ótip, jastarǵa rızashylyǵyn bildirdi.
– Shyn máninde, bul kún el ómirinde máńgi saqtalady. Endi 15 naýryz – Konstıtýsıa kúni bolyp belgilenedi. Bul – elimizdiń basty qujaty. Men basqa da memleketterdiń konstıtýsıalarymen tanysyp shyqtym. Bizdiń Konstıtýsıamyz eń úzdik Ata zańdardyń qatarynda turady dep senimmen aıta alamyn, – dedi Memleket basshysy.
Sonymen qatar Prezıdent jańa Konstıtýsıa, eń aldymen, jastarǵa arnalǵanyna nazar aýdardy. Ata zańǵa volonterlik qyzmet, ǵylym, ınovasıa, jasandy ıntellekt sıaqty uǵymdar engizilgenine toqtaldy.
– Aýqymdy úgit-nasıhat naýqany júrgizildi. Aldymyzda jumys kóp. Endi jazda Parlament saılaýy ótedi. Ony bir el bolyp atqarýymyz kerek. Bul jastardyń parlamenti bolýy qajet dep oılaımyn, – dedi Qasym-Jomart Toqaev.
Kezdesýde «Jastar rýhy» jastar qanatynyń tóraǵasy Aqerke Eskendirova, kreatıvti ındýstrıa ókili, kásipker Kamıl Baıramov, belsendi jastar Erjan Hamıtov pen Nurbol Serikbaı sóz sóıledi.
Jastar bir aı ishinde túrli formatta 5 myńǵa jýyq kezdesý ótkizip, oǵan 1,5 mıllıonnan asa azamat qatysqanyn jetkizdi. Sondaı-aq elimizde qolǵa alynǵan ózgeristerdiń barlyǵyn qoldaıtynyn aıtty.
