Memleket basshysy Qarjylyq monıtorıń agenttiginiń tóraǵasy Janat Elımanovty qabyldady, - dep habarlaıdy alnews Aqordaǵa silteme jasap.
Qasym-Jomart Toqaevqa Agenttiktiń bıylǵy birinshi jartyjyldyqta atqarǵan jumysynyń negizgi qorytyndylary men aldaǵy kezeńge arnalǵan mindetter týraly esep berildi.
Janat Elımanov 496 qylmystyq is boıynsha tergeý aıaqtalyp, jábirlenýshilerge 22,6 mıllıard teńgeniń zardaby ótelgenin jetkizdi. Sondaı-aq 7 qylmystyq toptyń (onyń ishinde tórteýi – transulttyq top) jáne 176 mıllıard teńgeden astam qarajatty zańsyz túrde qolma-qol aqshaǵa aınaldyrǵan 44 jeliniń qyzmetine tosqaýyl qoıylǵanyn atap ótti.
Esirtki bıznesi men alaıaqtyqtan túsken kiristi jylystatý úshin paıdalanylǵan 12 astyrtyn krıptoaıyrbastaý pýnkti joıylǵan. Budan bólek, óz esepshottary arqyly 113 mıllıard teńgeni ótkizgen 36 dropperlik top anyqtaldy.
Prezıdentke TMD elderi aýmaǵynda alǵash ret derbes derekterdi zańsyz ıemdený maqsatynda uıaly baılanys operatorlarynyń jumysyn ımıtasıa jasaıtyn jáne fıshıng SMS-habarlamalardy jappaı taratatyn arnaıy qurylǵyny paıdalanǵan adamdar ustalǵany baıandaldy.
Agenttik tóraǵasy búdjet shyǵystaryna monıtorıń júrgizý sharalary týraly aıtty. Máselen, 52 ınfraqurylymdyq joba boıynsha 279 mıllıard teńge qarjynyń negizsiz jumsalýyna jol berilgen joq. Ǵylymı ázirlemelerdi komersıalandyrý kezinde 10 mıllıard teńge kóleminde memleket qarjysyn jymqyrý yqtımaldyǵy anyqtaldy. Sondaı-aq Mindetti áleýmettik medısınalyq saqtandyrý qorynan zańsyz qarjy alý úshin jeke klınıkalardyń 140 myń azamattyń jalǵan tirkeý málimetterin kórsetkeni belgili boldy.
Budan bólek, aldyn alý jumystary aıasynda zańsyz oıyn bıznesiniń belgileri bar 9 myń saıt pen akkaýnt buǵattaldy. Alaıaqtyq pıǵylymen ashylǵan 2,3 myń resýrstyń jáne 35 myńnan asa múshesi bar 25 chattyń qyzmeti toqtatyldy.
Qarjylyq saýatty arttyrý baǵytyndaǵy is-sharalarǵa 245 myńnan astam azamat qatysty. Salalyq zańnamany jetildirýdiń nátıjesinde Qazaqstannyń reıtıńtegi orny FATF-tyń tórt negizgi usynymy boıynsha joǵarylady.
Kezdesý sońynda Memleket basshysy Agenttik qyzmetiniń negizgi baǵyttaryna qatysty birqatar naqty tapsyrma berdi.
