Prezıdent Qasym-Jomart Toqaev Dúnıejúzilik jasandy ıntellekt konferensıasynyń ashylý rásimine qatysty, - dep habarlaıdy alnews.
Shanhaıda ótip jatqan dástúrli jıyn bıyl «Jarqyn bolashaq úshin jasandy ıntellekt salasyndaǵy seriktestik» taqyrybyna arnalyp otyr.
Memleket basshysy bul konferensıa Qytaıdyń jasandy ıntellekt salasyndaǵy aıtýly jetistikterin aıqyn kórsetetinin atap ótti.
– Búginde dúnıe júzindegi jasandy ıntellektini zertteýshilerdiń jartysynan astamy – Qytaı eliniń ókilderi. JI salasyndaǵy patentterdiń basym bóligi qytaılyq jańashyl mamandarǵa tıesili. Al eldiń qarqyndy ınovasıalyq ekojúıesi ozyq tehnologıalardyń kóptegen baǵytynda sony serpilis jasaýda, – dedi Prezıdent.
Memleket basshysy Dúnıejúzilik jasandy ıntellekt konferensıasynda jarıalanǵan «Barsha adamzat ıgiligine qyzmet etetin JI» tujyrymdamasyna qoldaý bildirdi.
– Tehnologıalyq progresti barshanyń ıgiligine aınaldyrýǵa kúsh-jiger jumyldyrǵanda osy usynylǵan qaǵıdattardy basshylyqqa alǵan jón dep sanaımyn. Keleshektiń kelbetin ózara senim men ortaq múddege saı tyǵyz yntymaqtastyq ornatyp, seriktese áreket etetinder aıqyndaıdy. Men buǵan kámil senemin. Osy oraıda Tóraǵa Sı Szınpın usynǵan «Adamzattyń ortaq taǵdyry qoǵamdastyǵyn» qurý týraly tujyrymdamanyń mańyzy zor. Qazaqstan alysty boljaǵan bul bastamany joǵary baǵalaıdy ári jasandy ıntellekt dáýirinde onyń ózektiligi artyp keledi dep sanaıdy, – dedi Qasym-Jomart Toqaev.
