Almatyda «Jasyl el» jastar eńbek jasaqtarynyń jańa maýsymy bastaldy. 2026 jyly joba aıasynda 2100 jasóspirim men jasty jumyspen qamtý josparlanyp otyr. Bul týraly Óńirlik komýnıkasıalar qyzmetinde Almaty qalasy jastar saıasaty basqarmasynyń basshysy Azız Kajdenbek málimdedi.
Spıkerdiń aıtýynsha, búginde Almaty eldegi jastar eń kóp shoǵyrlanǵan qala. Qaladaǵy jastar sany 769 myńnan asady. Onyń ishinde 472,8 myńy — jumys isteıtin jastar, 307,8 myńnan astamy — joǵary oqý oryndary men kolej stýdentteri, al 80 myńǵa jýyǵy — joǵary synyp oqýshylary.
«Jasyl el» jobasy 2005 jyldan beri júzege asyrylyp keledi. Onyń maqsaty — ekologıalyq mádenıetti qalyptastyrý, eńbek daǵdysyn damytý jáne jastardy qoǵamdyq paıdaly jumystarǵa tartý.
«Memleket basshysy Qasym-Jomart Toqaev jastardy qoldaýǵa jáne ekologıalyq jaýapkershilikti qalyptastyrýǵa erekshe kóńil bóledi. «Jasyl el» jobasy «Taza Qazaqstan» jalpyulttyq bastamasynyń mindetterine tolyq sáıkes keledi jáne jastardy qalany damytýǵa tartýǵa kómektesedi», — dedi Azız Kajdenbek.
Onyń aıtýynsha, 2025 jyly Almaty «Jasyl el» jobasyn júzege asyrý boıynsha elimizdegi úzdik óńir dep tanyldy. Ótken maýsymda maýsymdyq jumyspen qamtý baǵdarlamasy aıasynda 2,1 myń jas jumysqa tartylǵan. Bıyl alǵash ret jobaǵa joǵary oqý oryndarynyń stýdentterimen qatar kolej stýdentteri men NEET sanatyndaǵy jastar da qatysty.
Almaty qalasy boıynsha «Jasyl el» jobasynyń jetekshisi Erdáýlet Júnisbek jastar eńbek jasaqtary jyl saıyn qalany kógaldandyrýǵa, aýmaqtardy sanıtarlyq tazalaýǵa, qoǵamdyq keńistikterdi kóriktendirýge jáne ekologıalyq aksıalarǵa qatysatynyn aıtty.
«Kóptegen qatysýshy úshin joba alǵashqy eńbek tájirıbesin alýǵa, qoǵamdyq qyzmette ózin kórsetýge jáne Almatynyń damýyna úles qosýǵa múmkindik beredi», — dedi Erdáýlet Júnisbek.
Jobaǵa 14 pen 35 jas aralyǵyndaǵy oqýshylar, stýdentter jáne jumyssyz jastar qatysa alady. Barlyq qatysýshy arnaıy «Jasyl el» formasymen qamtamasyz etiledi.
«Bizdiń maqsatymyz — jastardy ýaqytsha jumyspen qamtyp qana qoımaı, belsendi azamattyq ustanymdy, ekologıalyq mádenıetti jáne qalalyq ortaǵa degen jaýapkershilik sezimin qalyptastyrý», — dedi Azız Kajdenbek.
Erdáýlet Júnisbektiń aıtýynsha, eńbek maýsymy 30 qyrkúıekke deıin jalǵasady, al «Jasyl el» jańa maýsymy 2 maýsymda saltanatty túrde ashylady.
Jobaǵa ótinimdi oflaın formatta Serikov kóshesi, 6a/1 mekenjaıy boıynsha tapsyrýǵa bolady. Oqýshylarǵa qatysý úshin oqý ornyndaǵy áleýmettik pedagogke júginý qajet.
Jastar saıasaty basqarmasy ókilderiniń málimetinshe, bıyl jastardy qamtý aıasyn keńeıtip, «Jasyl el» jasaqtarynyń qatysýymen ótetin ekologıalyq jáne qoǵamdyq bastamalar sanyn arttyrý josparlanyp otyr.
