«Ádil sóz» sóz bostandyǵyn qorǵaý halyqaralyq qorynyń prezıdenti Qarlyǵash Jamanqulova Konstıtýsıalyq reforma jónindegi komısıanyń segizinshi otyrysynda QR jańa Konstıtýsıasyna árbir azamattyń memlekettik organdar men laýazymdy adamdardyń zańsyz áreketterinen nemese áreketsizdiginen kelgen zıandy óteý quqyǵy týraly normany engizýdi usyndy, - dep habarlaıdy alnews.
Ol sóz basynda Komısıa múshelerine kelisý, talqylaý jáne qyzý pikirtalastardyń kúrdeliligine qaramastan, ashyqtyq pen syndarlylyq ustanǵany úshin alǵysyn bildirdi.
«Zańger áriptesterime azamattyq qoǵamnyń usynystaryna naqty tujyrym tapqandary úshin alǵys aıtqym keledi», - dedi Qarlyǵash Jamanqulova.
Adam quqyqtaryn qorǵaý kepildikterin keńeıtý máselesine toqtala otyryp, memlekettik organdar qyzmet babyna qaraı kún saıyn adamdardyń taǵdyrymen baılanysta bolatynyn atap ótti.
Atap aıtqanda, memlekettik sheshimder – ruqsattar, tyıymdar nemese tekserýler qarapaıym adamnyń jumys isteý, oqý, emdelý jáne óz múlkin qorǵaý múmkindigin anyqtaıdy.
Qarlyǵash Jamanqulovanyń pikirinshe, adamnyń memlekettik organdardyń zańsyz áreketterinen nemese áreketsizdiginen keltirilgen zıandy óteý quqyǵy quqyqtyq memlekettiń jáne quqyqtar men bostandyqtardyń naqty sıpatynyń negizgi elementteriniń biri bolyp tabylady.
«Qazaqstandyqtar osyndaı zalal úshin barabar ótemaqy alýy tıis. Eger azamatqa ádiletsizdik jasalsa, ol jumsaǵan ýaqyty, aqshasy nemese tipti júıkesi úshin ótemaqy alýy kerek», – dep atap ótti ol.
Onyń aıtýynsha, mundaı konstıtýsıalyq kepildik azamattardy qorǵap qana qoımaı, memlekettik organdar men laýazymdy tulǵalar tarapynan zańsyz sheshimder men is-áreketter qabyldaý qaýpin azaıta otyryp, turaqty aldyn alý áserin tıgizedi.
«Eger sot memlekettik organdar men laýazymdy tulǵalardyń sheshimderi men is-áreketteri zańsyz dep tanyǵan jaǵdaıda, azamattarǵa osyndaı ótemaqy alý múmkindigine kepildik berý qajet», - dedi Qarlyǵash Jamanqulova.
Ol mundaı kepildikti Konstıtýsıa deńgeıinde engizý ár adamnyń quqyq sýbektiligin taný ekenin atap ótti.
«Jańa Konstıtýsıa árbir adam quqyqtar men mindetterdiń ıesi bolyp tabylatyndyǵynan jáne olardy, memleketten de qorǵaýdy óz betinshe talap etýge quqyly kendiginen týyndaıdy», – dedi ol.
Jalpy, Qarlyǵash Jamanqulovanyń pikirinshe, mundaı normany engizý árbir azamatty jarıa-quqyqtyq qatynastardyń teń quqyly qatysýshysy etedi, «Zań jáne Tártip» qaǵıdatyn iske asyrýdyń praktıkalyq quralyna aınalady.
«Saıyp kelgende, mundaı normamen jańa Konstıtýsıanyń jobasy el azamatyn, onyń múddeleri men quqyqtaryn birinshi orynǵa qoıatyn barynsha adamǵa baǵdarlanǵan bolady. Sondyqtan Konstıtýsıaǵa árbir azamattyń memlekettik organdardyń nemese olardyń laýazymdy tulǵalarynyń zańsyz áreketterinen nemese áreketsizdiginen kelgen zıandy óteý quqyǵy týraly normany engizýdi usynamyn», – dep túıindedi ol.
