Májilis depýtaty Snejanna Imasheva Konstıtýsıalyq reforma jónindegi komısıanyń 11-shi otyrysynda eldegi saıası úrdistiń úzdiksizdigin qamtamasyz etý úshin Qazaqstannyń jańa Konstıtýsıasy jobasynda barlyq ótpeli erejelerdi naqtylap jazý qajet degen pikir bildirdi.
Májilis depýtaty eń aldymen jańa Konstıtýsıanyń tártibi men kúshine ený merzimderin birjaqty etip anyqtaý qajet ekenin atap ótti.
«Jobada onyń erejeleri naqty qaı sátten bastap kúshine enetinin bekitý kerek. Respýblıkalyq referendýmnyń nátıjeleri resmı jarıalanǵan kúnnen bastap pa álde naqty belgilengen ózge kúnnen bastap pa?», - dedi ol.
Onyń aıtýynsha, sondaı-aq ótpeli kezeńdegi qazirgi memlekettik bılik organdarynyń mártebesi týraly máseleni retteý kerek.
Atap aıtqanda, qazirgi Parlament óz ókilettigin qaı sátke deıin júzege asyratynyn anyqtaý qajet, Quryltaı saılaýy qandaı merzimde jáne qandaı tártippen ótkiziledi?
«Meniń oıymsha, bul máselelerdi zańnamalyq fýnksıany júzege asyrýdyń úzdiksizdigin qamtamasyz etip, onyń ishinde Konstıtýsıanyń ınstıtýsıonaldyq jańashyldyqtaryn iske asyrý qajettiligin eskere otyryp qarastyrý kerek», - dep atap ótti depýtat.
Snejanna Imasheva ótpeli erejelerde Konstıtýsıalyq sot, Ortalyq saılaý komısıasy jáne Joǵary aýdıtorlyq palatanyń jańa quramyn qalyptastyrý tetikterin qarastyrý mańyzdy ekenin aıtty.
Buǵan qosa, negizgi memlekettik organdardyń laýazymdy tulǵalaryn taǵaıyndaý tártibi de reglamentteýdi talap etedi.
«Osy rásimderdi naqty bekitý quqyqtyq aıqyndylyqty qamtamasyz etedi jáne ınstıtýsıonaldyq aýysý kezeńinde konstıtýsıalyq organdardyń joqtyǵy jaǵdaıyn boldyrmaýǵa múmkindik beredi», – dedi ol.
Depýtattyń aıtýynsha, qazirgi zańnamany qoldaný máselesi erekshe nazar aýdarýdy talap etedi. Osyǵan baılanysty jańa Konstıtýsıanyń jobasynda Konstıtýsıa kúshine engen kúni qoldanylyp júrgen zańdar men ózge de normatıvtik quqyqtyq aktiler kúshin saqtaıdy ma jáne olar qandaı merzimde erejelerge sáıkestendirilýi tıis ekenin naqty belgileý qajet dedi ol.
«Atalǵan erejelerdi bekitý quqyqtyq aıqyndylyqty, memlekettik ınstıtýttardyń jumys isteýin boljaýdy jáne ótpeli kezeńdegi árbir organnyń ókilettikteriniń shegin naqty belgilenýin qamtamasyz etedi», – dep qorytyndylady Snejanna Imasheva.
