Izraıl Hezbolla kúshterine qarsy jańa soǵys maıdanyn ashýy múmkin. Bul týraly bir kún buryn eldiń premer-mınıstri Benámın Netanáhý málimdedi. Ol ızraıldik telearnaǵa jasaǵan málimdemesinde Gazadaǵy soǵys endi burynǵydaı qarqyndy bolmaıtynyn aıtqan. Sebebi, áskerlerdi soltústikke Lıvanmen shekaraǵa qaraı jóneltýdi oılastyrýda.
"Hamaspen soǵystyń qarqyndy kezeńi aıaqtalýda, bul soǵys aıaqtaldy degendi bildirmeıdi. Gazada atysty toqtatý kelisimi áli bola qoımaıdy. Kelesi shaıqas Lıvanda Hamastyń odaqtasy Hezbolla kúshterine qarsy bolýy múmkin" – degen Izraıl premer-mınıstri.
Netanáhý qaıtalaı bılikke kelgennen keıin ol ashynǵan ońshyl toptarmen koalısıa túzgeni málim. Ol óziniń bılik ishindegi yqpalyn saqtap qalý úshin de Gazadaǵy Hamasty túbimen qurtamyn degen ýádesinen bas tartpasy anyq. Al Hamasty qoldaǵan Hezbollla kúshteri Izraıldiń soltústik óńirlerin tymbaı bombalap keledi. Eki tarap arasynda tikeleı qarýly jaýaptasýlar da boldy.
Ótken aptada Izraıl kúshteri Lıvan jerine pármendi soqqylaryn jasady. Osydan keıin Hezbolla jetekshisi Izarılge qarata qatań málimdemesin jasaǵan.
Ol sózinde: "Biz soǵysýdan qoryqpaımyz, eger Izraıl bizge shabýyl jasaıtyn bolsa bul eshqandaı ymyrasyz jáne túpsiz soǵys bolady. Bizdiń buǵan álimiz jetedi", – degen.
Izraıl aldaǵy ýaqytta Gazada armıanyń az bóligin qaldyryp, negizgi kúshti Lıvanǵa baǵyttaýǵa daıyndalyp jatqanyn málimdedi. Bul Gazadaǵy soǵystyń aımaqqa taralýy múmkin degen byltyrdan bergi aıtylyp kele jatqan qaýipti rastaǵandaı boldy.
