Mańǵystaý oblysynda álemge áıgili akter Djekı Channyń qatysýymen túsiriletin «Dospehı Boga 4: Últımatým» halyqaralyq kıno jobasynyń túsirilimi bastaldy. Jobany Sálem Entertainment kompanıasy júzege asyrýda, - dep habarlaıdy alnews.
Qazirgi tańda túsirilim toby Mańǵystaýdyń biregeı tabıǵı landshafttarynda alǵashqy kadrlardy taspaǵa túsirýde. Fılmniń negizgi túsirilim alańdarynyń biri retinde álemge tanymal Bozjyra shatqaly tańdalǵan. 7-12 maýsym aralyǵynda atalǵan aýmaqta 35 adamnan turatyn túsirilim toby jumys júrgizip, fılmniń birqatar kórinisterin túsirdi.
Mańǵystaý oblysynyń ákimi Nurdáýlet Qılybaı shyǵarmashylyq top ókilderimen kezdesip, halyqaralyq aýqymdaǵy kıno jobany júzege asyrýǵa jan-jaqty qoldaý bildirdi. Kezdesý barysynda óńirde kreatıvti ındýstrıany damytý, kıno jáne televızıalyq jobalardy óndirý, jastarǵa arnalǵan sapaly medıakontent qalyptastyrý, sondaı-aq Mańǵystaýdyń týrısik jáne mádenı áleýetin halyqaralyq deńgeıde nasıhattaý máseleleri talqylandy.
– Mańǵystaý kınoındýstrıa salasyndaǵy aýqymdy jobalardy júzege asyrýǵa qolaıly óńir. Biz kreatıvti ekonomıkany damytýǵa, mádenı murany nasıhattaýǵa jáne óńirdiń týrısik tartymdylyǵyn arttyrýǵa baǵyttalǵan bastamalarǵa jan-jaqty qoldaý kórsetýge daıynbyz. Mundaı jobalar Mańǵystaýdy halyqaralyq deńgeıde tanytyp, óńirdiń áleýetin keńinen kórsetýge múmkindik beredi, – dedi oblys ákimi Nurdáýlet Qılybaı.
Atalǵan joba otandyq kınoındýstrıa úshin mańyzdy oqıǵa sanalady. Ol ishki týrızmdi halyqaralyq deńgeıde ilgeriletýge jańa múmkindikter ashady. Óńirdiń biregeı tabıǵı jáne tarıhı nysandarynyń halyqaralyq kıno jobada kórinis tabýy mıllıondaǵan kórermenniń nazaryn aýdaryp, týrızmniń damýyna, ınvestısıalyq tartymdylyqtyń artýyna jáne óńir men elimizdiń halyqaralyq bedeliniń nyǵaıýyna yqpal etedi.
Túsirilim jumystary bıyl aıaqtalady dep josparlanýda, al fılmniń prokatqa shyǵýy 2027 jyldyń aqpan aıyna belgilengen.
