Almaty ákimi Darhan Satybaldynyń tóraǵalyǵymen aldaǵy jylý berý maýsymyna qalalyq ınfraqurylymdy daıyndaý máselesi boıynsha keńes ótti, - dep habarlaıdy alnews.
Jıyn barysynda jylýmen, elektrmen, gazben jáne sýmen jabdyqtaý nysandarynyń daıyndyǵy, sondaı-aq turǵyn úı qory men áleýmettik nysandardyń aldaǵy qysqy kezeńge ázirligi qaraldy.
Energetıka jáne sýmen jabdyqtaý basqarmasy ókilderiniń málimetinshe, qalalyq sharýashylyqtyń jylý berý maýsymyna jalpy daıyndyǵy 50,5%. Barlyq jumys bekitilgen kestege sáıkes júrgizilýde. Qazirgi tańda «AlES» AQ nysandarynyń daıyndyǵy – 52%, «AJK» AQ – 46%, «Almaty Sý» MKK – 71%, «Almatyjylýjaıenergo» JSHS – 39%, «Almaty jylý júıesi» JSHS – 38%, gaz jelileriniń daıyndyǵy 57% bolady.
Turǵyn úı qoryn daıyndaý jaıyna erekshe nazar aýdaryldy. Almatyda 9 861 kóppáterli turǵyn úı bar, onyń 9 283-i ortalyqtandyrylǵan jylýmen jabdyqtaý júıesine qosylǵan. 22 maýsymdaǵy jaǵdaı boıynsha 984 turǵyn úı daıyndyq aktisin alǵan. Jylytý júıelerin shaıý jáne qysymmen tekserý, sondaı-aq úıishilik ınjenerlik jelilerdi jóndeý jumystary jalǵasýda. Bul jumystar bıylǵy jyldyń 10 qyrkúıegine deıin aıaqtalýǵa tıis.
Sonymen qatar basqarý organdary joq 230 kóppáterli turǵyn úıdiń jaǵdaıy jeke qaraldy. Olardy qysqy maýsymǵa daıyndaý úshin aýdan ákimdikterimen birlesip jylytý júıelerin shaıý jáne qysymmen tekserý, sondaı-aq qajetti energıa únemdeý sharalaryn júrgizý josparlanǵan. Atalǵan jumystardy tamyz aıynyń sońyna deıin aıaqtaý kózdelip otyr.
Keńes barysynda komýnaldyq kásiporyndardyń jóndeý jáne ınvestısıalyq baǵdarlamalardy iske asyrý barysy týraly esebi tyńdaldy. Atap aıtqanda, bıyl 20 shaqyrym jylý jelisin qaıta jańǵyrtý, 379 shaqyrym elektr jelisin jańǵyrtý, sondaı-aq jalpy uzyndyǵy 60 shaqyrymnan asatyn sý qubyry jáne káriz jelilerin qaıta jańǵyrtý josparlanǵan.
Darhan Satybaldy turǵyn úılerdi kúzgi-qysqy kezeńge daıyndaý máselesine erekshe nazar aýdaryp, bul jumystarǵa baqylaýdy kúsheıtý jóninde basqarmalar men aýdan ákimderine naqty tapsyrmalar berdi. Sonymen qatar qala ákimi turǵyn úı qorymen qatar barlyq áleýmettik nysannyń qysqy maýsymǵa daıyndyǵy máselesin óziniń turaqty baqylaýynda ustaıtynyn atap ótti.
