Astanada Qazaqstandaǵy Reseıdiń mádenıet kúnderi aıasynda Reseı kınosy festıvali bastaldy. Festıvál baǵdarlamasy 26 sáýirge deıin jalǵasyp, eki el arasyndaǵy mádenı-gýmanıtarlyq baılanystardy odan ári nyǵaıtýǵa baǵyttalǵan, - dep habarlaıdy alnews.
İs-sharanyń ashylýynda «ROSKINO» bas dırektory Elza Antonova Reseı Federasıasynyń Mádenıet mınıstri Olga Lúbımovanyń quttyqtaý hatyn oqyp berdi.
«Qazaqstandaǵy Reseı kınosy festıvaliniń ótkizilýi óner men kınematografıa arqyly yntymaqtastyǵymyzdy arttyra túsýge jol ashady. Bul joba mádenı almasýdy jandandyryp, halyqtar arasyndaǵy ózara túsinistik pen rýhanı úndestikti tereńdete túsedi», – delingen quttyqtaý hatta.
Elza Antonova «ROSKINO» jyl saıyn álemniń birqatar elinde Reseı kınosy festıválderin ótkizetinin, alaıda Qazaqstandaǵy festıváldiń orny aıryqsha ekenin atap ótti. Onyń aıtýynsha, baǵdarlamaǵa búginde Reseıde prokatqa shyǵyp, qalyń kórermenniń joǵary baǵasyna ıe bolǵan jáne zamanaýı reseılik kınonyń janrlyq alýandyǵyn kórsetetin fılmder engizilgen.
Sh.Aımanov atyndaǵy «Qazaqfılm» AQ prezıdentiniń mindetin atqarýshy Aıdar Omarov mundaı jobalar eki el arasyndaǵy mádenı baılanystardy baıytyp, ulttyq kınony ilgeriletýge tyń serpin beretinin atady.
Festıváldiń ashylýynda «Pervyı na Olımpe» sport dramasy kórsetildi. Tórt kún boıy kórermenderge ártúrli janrdaǵy jeti reseılik fılm tegin usynylady. Baǵdarlamaǵa sondaı-aq «Avıator», «Býratıno», «Chebýrashka 2», «Krasnyı shelk», «Trı kota. Pýteshestvıe vo vremenı» jáne «Avgýst» fılmderi engen.
Festıvál aıasynda delegasıa ókilderimen kezdesýler men shyǵarmashylyq mamandyqta oqıtyn qazaqstandyq stýdentterge arnalǵan sheberlik sabaqtary josparlanǵan. Kórermendermen kezdesýge «Avıator» fılminde oınaǵan aktrısa Dará Kýkarskaıa men «Pervyı na Olımpe» kartınasynda ról somdaǵan akter Anton Savvatımov qatysady.
