2026 jyldyń 6–22 aqpany aralyǵynda Mılanda Qorǵanys mınıstrligi Armıa ortalyq sport klýbynyń áskerı qyzmetshileri Qysqy Olımpıada oıyndarynda Qazaqstannyń atynan saıysqa túsedi, - dep habarlaıdy alnews.
Ulttyq quramanyń qataryna respýblıkalyq jáne halyqaralyq deńgeılerde aıtarlyqtaı jetistikteri bar jeti armıa sportshysy – bıatlonshylar men shańǵyshylar kirdi.
Bıatlon jarysynda efreıtor Vladıslav Kıreev – sprıntte 2025 jylǵy Qysqy Azıa oıyndarynyń chempıony, Azıada-2025 erler estafetasynyń kúmis júldegeri, Azıa chempıonatynyń altyn jáne qola medaldarynyń ıegeri synǵa túsedi. Álem Kýbogy maýsymynda ol qazaqstandyq bıatlonshylar arasynda úzdik nátıje kórsetip, kezeńderdiń birinde úzdik 20 sportshynyń qataryna kirgen bolatyn.
Budan ózge el namysyn qorǵaıtyndar sapynda 2025 jylǵy Qysqy Azıa oıyndarynyń kúmis júldegeri, Dúnıejúzilik Ýnıversıadanyń eki dúrkin kúmis júldegeri, halyqaralyq dárejedegi sport sheberi Áset Dúısenov; «Azıa balalary» Halyqaralyq jasóspirimder jarystarynyń qola júldegeri, halyqaralyq dárejedegi sport sheberi Aısha Raqysheva; IBU kýbogy kezeńderiniń birneshe dúrkin qatysýshysy Mılana Geneva da bar.
Ulttyq komanda úshin shańǵy jarystarynda Dúnıejúzilik Ýnıversıadanyń qola júldegeri, 2022 jylǵy Olımpıada oıyndarynyń qatysýshysy, 2025 jylǵy Qysqy Azıa oıyndary estafetasynyń kúmis júldegeri Nadejda Stepashkına; halyqaralyq dárejedegi sport sheberi, 2025 jylǵy Azıa oıyndarynyń kúmis júldegeri, Dúnıejúzilik Ýnıversıadanyń eki dúrkin qola júldegeri, 2022 jylǵy Olımpıada oıyndarynyń qatysýshysy Ksenıa Shalygına; shańǵy jarysy boıynsha Qazaqstan Kýbogynyń jeńimpazy, ulttyq jáne halyqaralyq jarystardyń birneshe dúrkin júldegeri Anna Melnık baǵyn synaıdy.
Ásker sportshylarynyń Olımpıada oıyndaryna qatysýy kóp jylǵy tynymsyz ári júıeli eńbekpen kelgen dıyndyqtyń, temirdeı tártip pen kásibı deńgeıdiń joǵary nátıjesi ekeni sózsiz.
