«Qazaqtelekom» Aqtaý qalasyndaǵy optıkalyq jelini keńeıtýde, - dep habarlaıdy alnews.
Jyl basynan beri kompanıa segiz turǵyn úıdi óz ınfraqurylymyna qosty, al jaqyn arada qaladaǵy taǵy tórt turǵyn úı keshenin GPON tehnologıasy arqyly ınternetke qosýdy josparlap otyr. Jańadan qosylǵan nysandardyń biri – 240 páterli «Aısar» turǵyn úı kesheni.
Aqtaýdaǵy «Aısar» turǵyn úı kesheninde turatyn Zúlpıa Arahovanyń otbasy úshin úıdiń optıkalyq jelige qosylýy oqý jylynyń bastalýymen tuspa-tus keldi. Otbasynda ınternetti balalar oqý, aqparat izdeý jáne onlaın sabaqtarǵa qatysý úshin barynsha paıdalanady.
«Qazir oqý jyly bastalǵan kezde ınternet balalarǵa asa qajet. Olar úı tapsyrmalaryn oryndaıdy, qosymsha aqparat izdeıdi, onlaın oqıdy. Sondyqtan otbasymyz úshin ınternettiń jyldam ári turaqty bolǵany mańyzdy. Endi mundaı qyzmetterdiń bizdiń úıde de qoljetimdi bolǵany óte yńǵaıly», – dedi Zúlpıa Arahova.
GPON tehnologıasy arqyly optıkalyq-talshyqty jeli abonenttiń páterine tikeleı tartylady. Bul bir jeli arqyly úıdegi ınternet, teledıdar jáne basqa da sıfrlyq servısterdi qatar paıdalanýǵa múmkindik beredi.
Jańa turǵyn úı keshenderimen qatar, «Qazaqtelekom» jeke sektordaǵy optıkalyq jelini de keńeıtýdi josparlap otyr. Kelesi jobalardyń biri Mańǵystaý oblysy Munaıly aýdanyndaǵy Qyzyltóbe aýylynda júzege asyrylady. Munda shamamen 1 200 úıdi GPON tehnologıasyna qosý múmkindigi qarastyrylǵan. Joba aıasynda shamamen 800 port salý kózdelgen.
«Biz Aqtaý qalasynyń ózinde de, oǵan jaqyn eldi mekenderde de optıkalyq jelini damytýdy jalǵastyryp jatyrmyz. Qazir qalada taǵy tórt turǵyn úı keshenin qosýǵa daıyndyq júrgizilýde. Aldaǵy aýqymdy jumystardyń biri Qyzyltóbede júrgiziledi – munda jeli jer úılerge tartylady. Zamanaýı ınfraqurylym tek jańa kópqabatty úılerde ǵana emes, sapaly symdy ınternetke muqtaj jeke úılerde turatyn turǵyndarǵa da qoljetimdi bolýy biz úshin mańyzdy», – dep atap ótti «Qazaqtelekom» bólshek bıznes dıvızıonynyń Installásıalyq jumystar departamenti Aqtaý qalasy sehynyń bastyǵy Baýyrjan Qalıev.
Jańa nysandardy qospas buryn kompanıa mamandary turǵyndarmen kezdesip, qoljetimdi qyzmetter týraly keńes beredi jáne ótinimder jınaıdy. Mundaı format suranysty baǵalaýǵa jáne jelini damytý kezeńiniń ózinde qosylýǵa degen qajettilikti anyqtaýǵa múmkindik beredi.
