Qazaqstandyq jas dombyrashylar halyqaralyq baıqaýda úzdik atanyp, qazaqtyń ulttyq ónerin álemge tanytty, - dep habarlaıdy alnews.
Túrkıanyń Alaná qalasynda ótken «Golden Stars Alanya» II halyqaralyq baıqaýynda «Álqıssa» dombyra stýdıasy aspapta oryndaý janry boıynsha Bas júldege ıe boldy.
Baıqaýda jas erekshelikterine qaraı óner kórsetken dombyrashylarymyz «Dombyra», «Kelinshek», «Erke sylqym» jáne «Sekirtpe» kúılerin oryndap, qazylar alqasy men kórermenderdiń joǵary baǵasyna ıe boldy. Qazaqstanmen qatar Reseı, Ózbekstan, Túrkıa jáne basqa da memleketterdiń ónerpazdary qatysqan halyqaralyq óner dodasynda Bas júldeni ıelený – stýdıa úshin úlken jetistik ári qazaq óneriniń mereıi.
Bul jeńis – jas dombyrashylardyń talanty men ustazdarynyń kásibı eńbeginiń nátıjesi. Stýdıa shákirtterine dombyra ónerinen Nurǵısa Tilendıevtiń tikeleı shákirti Qanatbek Sáden, «Ybyraı Altynsarın» tósbelgisiniń ıegeri Ǵalıabaný Erbolǵan, sondaı-aq bilikti kásibı mamandar Ramazan Alıhanov pen Aıdana Saıram dáris beredi. Ustazdardyń basty maqsaty – balalarǵa kúı úıretip qana qoımaı, ulttyq ónerge degen súıispenshiligin qalyptastyryp, qazaqtyń qara dombyrasyn álemge tanytý.
«Álqıssa» dombyra stýdıasy buǵan deıin de halyqaralyq deńgeıde óner kórsetken. 2026 jyldyń naýryz aıynda AQSH-qa barǵan stýdıa shákirtteri Nú-Iork qalasyndaǵy áıgili Times Square alańy mańynda kúı shertip, qazaqtyń ulttyq aspabyn álem jurtshylyǵyna tanytqan bolatyn.
Alanádaǵy Bas júlde – osy baǵyttaǵy eńbektiń taǵy bir jarqyn nátıjesi. Ulttyq ónerdi ulyqtap, qazaq kúıiniń shekara asyp, álemdik sahnalarda shyrqalýyna úles qosyp júrgen jas dombyrashylardyń jetistigi qýantady.
Qazaqtyń qara dombyrasyn tórge ozdyryp, elimizdiń abyroıyn asqaqtatqan «Álqıssa» stýdıasynyń ónerpazdary men ustazdaryn Bas júldemen shyn júrekten quttyqtaımyz! Baǵyndyrar belesterińiz bıik bolsyn!
