Áleýmettik mańyzy bar azyq-túlik taýarlarynyń baǵasyn turaqtandyrý jáne onyń negizsiz ósýine jol bermeý maqsatynda Almaty qalasy Kásipkerlik jáne ınvestısıalar basqarmasy qalalyq Saýda jáne tutynýshylardyń quqyǵyn qorǵaý departamentimen jáne basqa da memlekettik organdarmen birlesip, azyq-túlik naryǵyndaǵy baǵa turaqtylyǵyn qamtamasyz etýge baǵyttalǵan keshendi sharalardy turaqty túrde júrgizip keledi, - dep habarlaıdy alnews.
Atap aıtqanda, azyq-túlik taýarlarynyń baǵasyn qalyptastyrýdyń barlyq kezeńindegi deldaldyq sqemalardy anyqtaý jónindegi óńirlik komısıanyń otyrystary turaqty túrde ótkiziledi. Komısıa jumysy aıasynda iri saýda nysandarynda, saýda jelilerinde, sýpermarketterde, bazarlarda jáne úı mańyndaǵy dúkenderde saýda qyzmeti salasyndaǵy zańnama talaptarynyń saqtalýyna júıeli túrde monıtorıń júrgizilip, taldaý jasalady.
Áleýmettik mańyzy bar azyq-túlik taýarlaryna belgilengen saýda ústemesiniń shekti mólsherin saqtaý máselesine erekshe nazar aýdarylady.
Júrgizilgen jumystardyń nátıjesinde jyl basynan beri áleýmettik mańyzy bar azyq-túlik taýarlaryna belgilengen saýda ústemesiniń shekti mólsherinen asyrý jáne saýda qyzmetin retteý salasyndaǵy zańnamanyń ózge de talaptaryn buzý faktileri boıynsha talaptardy saqtamaǵan kásipkerlik sýbektilerine qatysty jalpy somasy 82 mln teńgeden asatyn 2003 ákimshilik hattama toltyryldy.
Bul baǵyttaǵy jumys jalǵasyp jatyr jáne zańnama talaptarynyń saqtalýyn qamtamasyz etýge, sondaı-aq qalanyń azyq-túlik naryǵyndaǵy baǵa turaqtylyǵyn qoldaýǵa baǵyttalǵan.
