Almatynyń Túrksib aýdanyndaǵy «Juldyz» shaǵynaýdanynda on kópqabatty úıge tıesili tórt aýla kúrdeli jóndeýden ótti, - dep habarlaıdy alnews.
Jumystar № 44–45, № 46, № 18 jáne № 18A úılerdiń aýlasyn qamtydy. Bul týraly Túrksib aýdany ákimdiginiń ókilderi habarlady.
Aýlalardaǵy asfált jabyny jańartylyp, ashyq aspan astyndaǵy jattyǵý qurylǵylary, oryndyqtar, qoqys jáshikteri jáne shaǵyn sáýlet nysandary ornatyldy. Balalar jáne sport alańdaryna rezeńke jabyn tóselip, syrtqy jaryqtandyrý júıesi jańartyldy, sý burý júıeleri ornatyldy. Sondaı-aq beınebaqylaý kameralaryn ornatý qarastyrylǵan.
Aýlalardy kúrdeli jóndeýden bólek, 2026 jyly aýdanda taǵy 16 aýlaǵa aǵymdaǵy jóndeý jumystary júrgizildi.
Qoǵamdyq keńistikterdi jańartý jumystary «Halyq qatysatyn búdjet» baǵdarlamasy aıasynda da júzege asyrylyp jatyr. Bıyl Túrksib aýdanynda turǵyndar usynǵan 24 joba iske asyrylýda. Olardyń qatarynda 11 skver men júrginshiler aımaǵyn, segiz balalar jáne sport alańyn kórkeıtý, tórt avtomatty sýarý júıesin ornatý jáne bir avtoturaq salý jobasy bar.
Baǵdarlama aıasynda turǵyndar aýlalardy kórkeıtý, qoǵamdyq aýmaqtardy jańartý jáne qala ınfraqurylymyn damytý boıynsha joba usyna alady.
Baǵdarlama týraly tolyq aqparat https://budget.open-almaty.kz/ saıtynda jarıalanǵan.
