Almatynyń Jetisý aýdanynda Qazybaev kóshesiniń boıyndaǵy júrginshiler aleıasy kórkeıtilip, «Jetisý» saıabaǵy jańartyldy, - dep habarlaıdy alnews.
Almaty ákimi Darhan Satybaldy jumys sapary barysynda atqarylǵan jumystardyń nátıjesimen tanysty.
Qazybaev kóshesinde uzyndyǵy 1 shaqyrymnan asatyn, jalpy aýmaǵy 2,3 gektar jer kórkeıtildi. Munda serýendeýge arnalǵan jol men jańa skverler salynyp, kógal tóseldi, avtomatty jáne tamshylatyp sýarý júıesi ornatyldy. Kógaldandyrý aıasynda 21 myńnan astam buta egildi. Sondaı-aq 150 aǵash egý jumysy jalǵasyp jatyr. Onyń 72-si – iri jóke aǵashy, qalǵan 78-i – jas kóshet.
Aýmaqty sanıtarlyq tazalaýǵa erekshe kóńil bólindi. Kórkeıtý jumystary barysynda bul jerden 194 samosval qurylys qaldyǵy shyǵaryldy. Buryn kútimsiz jatqan aýmaqtardyń ornynda turǵyndardyń serýendeýine jáne demalýyna arnalǵan jasyl aımaq paıda boldy.
Aralaý barysynda Darhan Satybaldy tazalyq pen sanıtarlyq tártipti saqtaý jumystaryn kúsheıtýdi, kórkeıtilgen aýmaqtardyń tıisti kútimin qamtamasyz etýdi jáne zańsyz qoqys úıindileriniń qaıta paıda bolýyna jol bermeýdi tapsyrdy.
«Jetisý» saıabaǵynda da kórkeıtý jáne kógaldandyrý jumystary júrgizildi. Tartan jáne plıta jabyny tóselip, 210 týıa, 720 buta jáne 269 kópjyldyq ósimdik otyrǵyzyldy. Aýmaqty jaryqtandyrý úshin 153 jaryq shamy ornatyldy.
Qala ákimi bos jatqan jer aýmaqtaryn odan ári kórkeıtý jaıyna da erekshe nazar aýdardy. Ol turǵyndardyń qajettiligin eskere otyryp, bul aýmaqtardy tıimdi paıdalaný jolyn, onyń ishinde shaǵyn skverler, jasyl aımaq pen kúndelikti demalys oryndaryn qurý múmkindigin qarastyrýdy tapsyrdy.
Qazybaev kóshesindegi aleıany kórkeıtý jumystary demeýshilik qarajat esebinen júrgizildi.
Qazybaev kóshesin kórkeıtý Jetisý aýdanynda júrginshi baǵyttary men qoǵamdyq keńistikterdiń biryńǵaı júıesin qalyptastyrý aıasyndaǵy júıeli jumystyń bir bóligine aınaldy. Jaqyn mańda tórt bilim berý mekemesi – eki balabaqsha, mektep jáne kolej ornalasqan. Jańa aleıa turǵyn úılerdi áleýmettik nysandarmen baılanystyryp, balalardyń, ata-analar men stýdentterdiń jaıaý júrip-turýyna qolaıly jaǵdaı jasaıdy.
«Jetisý» saıabaǵyn jańartýmen qatar, bul jumystar aýdannyń jasyl ınfraqurylymyn damytýǵa, júrginshilerge yńǵaıly baǵyt qalyptastyrýǵa jáne turǵyndardyń úıine jaqyn jerde qoljetimdi demalys oryndaryn qurýǵa baǵyttalǵan.
