Aqpannyń 5-nen bastap otandyq kınoteatrlarda rejıser Dýman Erkimbek pen prodúser Jalyn Tileýbergenniń «Ǵashyqpyn saǵan» atty fılmi jaryq kóredi, - dep habarlaıdy Alnews.
Fılm avtorlarynyń aıtýynsha, bul zamanaýı álemdegi mahabbattyń orny men adam ómirindegi rólin qaıta oı eleginen ótkizip, jańasha baǵamdaýǵa tyrysqan tyń týyndy.
Sújet boıynsha Almatyǵa arman qýyp kelgen Eńlik tezirek baıyp ketip, aýyldaǵy anasy men inisin qalaǵa kóshirip ákelýdi maqsat etedi. Ákesiz ósken qyz oqý men jumysty qatar alyp júrip, ómirdiń aýyrtpalyǵyna qarsy turýǵa tyrysady. Alaıda úlken qalanyń óz zańdary men kútpegen synaqtary bar. Myńdaǵan taǵdyr toǵysqan qalada Eńlik ánshi bolýdy armandaıtyn Arman degen jigitpen kútpegen jerden tanysady. Bul kezdesý eki jastyń ómirin túbegeıli ózgertedi. Eńliktiń aldynda eki tańdaý tur. Ne otbasy úshin óz jolyn qurban etip baılyqqa qol jetkizý, ne ózi úshin ómir súrip, mahabbatty tańdaý.
Bas rólderde qazaq kınonyń jas juldyzdary – Shuǵyla Eshen jáne Jasulan Kópbergen oınaıdy. Eki akter ótken jyly hıt bolǵan Qaitadan fılminde de birge túsken bolatyn. Sonymen qatar Shuǵyla Eshen «SHEKER. Sońǵy múmkindik» fılmi úshin 2025 jyly «Synshylar tańdaýy» júldesiniń «Ekinshi plandaǵy úzdik áıel róli» nomınasıasynda jeńimpaz atanǵan. Ekinshi planda tanymal akterler Ábilmansur Serikov, Saǵyzbaı Qarabalın, Adelına Eralıeva, Erbolat Toǵyzaqov oınaıdy.
«Bul fılmniń ıdeıasy bizge – jubaıym ekeýmizge, osydan jeti jyl buryn kelgen. Dál qazir elimizde kıno jaqsy damyp jatyr, alaıda mahabbat jaıly fılmder áli de sırek. Sondyqtan osy taqyrypta fılm túsirgimiz keldi. «Ǵashyqpyn saǵan» bizdiń ǵana oqıǵa emes, bul Almatyda tanysqan mıllondaǵan jastar, mıllıondaǵan juptar jaıly fılm», - deıdi rejıser Dýman Erkimbek.
Prodúser Jalyn Tileýbergenniń aıtýynsha kınoda Almatynyń ádemi jerleri kóp kórsetiledi. Tipti fılminiń alǵashqy ataýy – «Almatynyń biz bilmeıtin kósheleri» bolý kerek bolǵan eken. Aıta ketsek, Jalyn men Dýman ótken jyly Qaitadan atty fılmderimen kózge túsip, jaqsy kórsetkishterge qol jetkizgen – 2025 jyldyń qorytyndysy boıynsha týyndy prokatta bir mıllıard teńgeden astam qarajat jınady.
Sonymen birge «Ǵashyqpyn saǵan» fılmi ásem án men mýzykaǵa da toly – kartınanyń kompozıtorlary Oljas Dalelhan («Nýrıkamal») men Sultan Tursynbekov («Bolmaǵan balalyq shaq»). Melodramada ánshi ARShAT-tyń búkil jastarǵa «Qatigezdeý Almaty» atymen tanymal áni, dudeontheguitar-men birlesip shyǵarǵan Gashyqpyn sagan óleńderi shyrqalady.
Qaitadan fılminiń avtorlarynan jańa týyndy – «Ǵashyqpyn saǵan» melodramasyn 5 aqpannan bastap barlyq kınoteatrlardan kórsetiledi.
