Ál-Farabı atyndaǵy Qazaq ulttyq ýnıversıtetinde jańa Konstıtýsıa jobasyn talqylaýǵa arnalǵan akademıalyq tyńdaýlar ótti, - dep habarlaıdy alnews.
İs-sharaǵa QR Parlamenti Májilisiniń depýtattary Únzıla Shapaq, Ermurat Bapı, Erlan Saırov, sýdıalar, memlekettik organdardyń ókilderi, akademıalyq qaýymdastyq músheleri, jetekshi zańger-ǵalymdar, sondaı-aq konstıtýsıalyq quqyq salasyndaǵy tájirıbeli advokattar men sarapshylar qatysty.
Dóńgelek ústel otyrysyn QazUÝ zań fakúltetiniń dekany Ýálıhan Ahatov ashyp, jańa Konstıtýsıa jobasynyń mazmundyq ári ıdeıalyq ózegi preambýlada aıqyn kórinis tapqanyn jetkizdi.
«Jańartylǵan preambýla formaldy kirispe emes, memlekettiń rýhanı-ıdeıalyq tuǵyry, Konstıtýsıanyń búkil mátinin biriktirip turǵan qundylyqtyq baǵdar retinde usynylady. Dál osy bólimde memlekettiń tarıhı jady, qoǵamdyq kelisimge degen umtylysy jáne bolashaq damýdyń strategıalyq baǵyty jınaqtalǵan», – dedi Ýálıhan Ahatov.
Akademıalyq tyńdaýda memlekettik bıliktiń konstıtýsıalyq negizderin nyǵaıtý, adam quqyqtary men bostandyqtarynyń kepildigin keńeıtý jáne qazirgi qoǵamdyq-saıası ózgerister jaǵdaıynda quqyqtyq ınstıtýttardyń rólin arttyrý máselesi qarastyryldy.
Jıynda depýtat Únzıla Shapaq Konstıtýsıadaǵy ózgerister azamattardyń quqyqtary men bostandyqtaryn qorǵaýdy kúsheıtýge, memlekettik basqarý júıesin odan ári jetildirýge baǵyttalǵanyn aıtty.
«Jańa Konstıtýsıanyń jobasy buqaralyq aqparat quraldaryna jarıalanǵannan bastap qoǵam arasynda keńinen talqylanýda. Qazirdiń ózinde Konstıtýsıalyq komısıa túsken usynystardy qarastyryp, jan-jaqty taldaý jumystaryn júrgizip jatyr. Sondyqtan áli de jańa Konstıtýsıaǵa tolyqtyrýlar men ózgerister engiziledi. Osy oraıda, ýnıversıtettik ǵalym-sarapshylarmen birlesip akademıalyq tyńdaýlar ótkizý asa mańyzdy», – dedi depýtat.
Májilis depýtaty Ermurat Bapı óz sózinde jańa Konstıtýsıa jobasyn talqylaý qoǵam úshin aıryqsha mańyzdy kezeń ekenin atap ótti.
«Konstıtýsıa memlekettiń quqyqtyq qańqasy ǵana emes, qoǵam men bıliktiń ózara seniminiń kepili. Sondyqtan usynylyp otyrǵan ózgerister eń aldymen azamattardyń quqyqtary men bostandyqtaryn naqty qorǵaýǵa, memlekettik ınstıtýttardyń jaýapkershiligin arttyrýǵa baǵyttalýy tıis. Bul rette akademıalyq orta men zańger-ǵalymdardyń saraptamalyq pikiri erekshe mańyzǵa ıe. Bul saıası naýqan eldiń bolashaǵyn saqtaýda jasalyp jatqan aýqymdy bastama», – dedi Ermurat Bapı.
Akademıalyq tyńdaýlar kezinde zań ǵylymynyń doktory, profesor Alýa Ibraeva, zań ǵylymynyń kandıdaty, profesor Leıla Kúltemirova, Almaty qalasy Alataý aýdanynyń sýdıasy Talǵat Dáýletnıazov baıandama jasady.
Shara barysynda qatysýshylar jańa Konstıtýsıa jobasynyń negizgi erejelerin jan-jaqty ári kásibı turǵyda talqylap, usynylyp otyrǵan ózgerister jóninde taldaý jumystaryn júrgizdi. Sonymen qatar halyqaralyq tájirıbe men ulttyq quqyqtyq dástúrlerdi eskere otyryp, ǵylymı negizdelgen usynystar ázirledi.
Nátıjesinde jınaqtalǵan saraptamalyq usynymdar men taldamalyq materıaldar aldaǵy ǵylymı-taldamalyq, saraptamalyq-konsýltatıvtik jáne qoǵamdyq-aǵartýshylyq qyzmette, sondaı-aq konstıtýsıalyq quqyq pen memlekettik basqarý salasyndaǵy ǵylymı zertteýlerdi damytýda paıdalaný josparlanýda.
