22 qyrkúıekte Almatyda Qazaqstan Táýelsizdiginiń 35 jyldyǵyna arnalǵan «Táýelsizdiktiń 35 jyldyǵy» arnaıy telejobasynyń túsirilimi ótedi, - dep habarlaıdy alnews.
«Aıǵaq» telearnasy ázirlep jatqan joba aıasynda Táýelsizdik monýmenti men «Táýelsizdik tańy» eskertkishinde túsirilim júrgizilip, ǵalym Asyly Osmanmen arnaıy suhbat uıymdastyrylady.
Telejoba Qazaqstannyń táýelsizdik jolyndaǵy tarıhı kezeńderin keńinen tanytýǵa, el azattyǵy men memlekettiń qalyptasýyna úles qosqan tulǵalardyń ónegeli ómirin dáripteýge, sondaı-aq tarıhı oryndardy nasıhattaýǵa baǵyttalǵan.
Almatydaǵy túsirilim baǵdarlamasy Respýblıka alańyndaǵy Táýelsizdik monýmentinen bastalady. 1996 jyly Táýelsizdiktiń bes jyldyǵyna oraı ashylǵan monýmenttiń bıiktigi – 28 metr. Onyń tóbesinde qanatty barysty tizgindegen Altyn adam beınesi ornalasqan.
Joba qatysýshylary Sátbaev pen Jeltoqsan kósheleriniń qıylysyndaǵy «Táýelsizdik tańy» eskertkishine de barady.
Baǵdarlama aıasynda fılologıa ǵylymdarynyń doktory, profesor, Qazaqstannyń eńbek sińirgen qaıratkeri Asyly Osmanmen suhbat josparlanǵan. Suhbat barysynda táýelsizdik qundylyǵy, memlekettik til, ulttyq sana men tarıhı jad máseleleri sóz bolady.
Budan keıin joba qatysýshylary Keńsaı-2 zıratyna baryp, Qazaqstannyń Halyq jazýshysy Sherhan Murtaza, kórnekti jazýshy-dramatýrg Oralhan Bókeı, memleket qaıratkerleri Qalyq Abdýllaev pen Berdibek Saparbaevtyń rýhyna taǵzym etpek.
«Táýelsizdiktiń 35 jyldyǵy» telejobasy elimizdiń birneshe óńiri men iri qalalaryn qamtıdy. Joba avtorlary tarıhı oryndar men tulǵalar taǵylymyn kórsetý arqyly táýelsizdiktiń qadir-qasıetin jas urpaqqa jetkizýdi kózdep otyr.
