Almatyda Qala kúnin eki kún boıy merekeleý aıaqtaldy. 19 jáne 20 qyrkúıekte qalanyń negizgi alańdarynda jáne barlyq segiz aýdanda konsertter, festıválder, kórmeler, sporttyq jáne shyǵarmashylyq is-sharalar ótti. Eki kún ishinde olarǵa 1 mln-nan astam qala turǵyny men qonaǵy qatysty. Bul týraly Almaty qalasy Mádenıet basqarmasynyń ókilderi habarlady.
Abaı alańynda Almaty ákimi Darhan Satybaldynyń qatysýymen saltanatty konsert ótip, «Almaty qalasynyń qurmetti azamaty» ataǵyn tabystaý rásimi uıymdastyryldy. Sondaı-aq, «Sazgen sazy» fólklorlyq-etnografıalyq ansambli, Qazaq memlekettik sırkiniń artıseri, ASU ujymy jáne «Alataý» dástúrli óner teatry óner kórsetti. Budan bólek, pıanıs Ratovich, NE PROSTO ORCHESTRA jáne «D Billions» halyqaralyq mýzykalyq shoýy kórermenderge merekelik kóńil kúı syılady.
Qonaqtar úshin taqyryptyq jáne balalar aımaqtary, AI & ROBOT ZONE, kraft oıyndar alańy jáne kásibı sýretshilerdiń «Ajarly Almaty» atty týyndylar kórmesi jumys istedi.
Astana alańynda kúndizgi konserttik baǵdarlamalar, «Almaty Vibes» mýzykalyq festıvali jáne «Almaty Zhuldyzy» konserti ótti. Almaty tarıhyna arnalǵan 3D Mapping Show merekeniń basty oqıǵalarynyń birine aınaldy.
Panfılov jáne Jibek joly kóshelerinde konsertter, shyǵarmashylyq baǵdarlamalar jáne qýyrshaq teatrynyń qoıylymdary uıymdastyryldy. Kitap Fest kitap jármeńkesi 60-tan astam baspa men kitap dúkeniniń basyn qosyp, 50 myńnan astam kelýshini jınady.
İri is-sharalardyń biri Alma jármeńkesi boldy. Eki kún ishinde munda jergilikti óndirýshiler men sharýa qojalyqtary usynǵan 50 suryptaǵy 250 tonnadan astam alma satyldy.
«Alataý» dástúrli óner teatry aldyndaǵy alańda tanymal oryndaýshylar men shyǵarmashylyq ujymdardyń qatysýymen «Án men kúıdiń besigi», «Jana Lep» jáne «Almatyǵa mahabbatpen» konsertteri ótti.
Merekelik kúnderi Masanchı kóshesiniń Sátbaev dańǵylynan Abaı dańǵylyna deıingi bóliginde alǵashqy gastronomıalyq kóshe de ashyldy. Munda qoǵamdyq tamaqtaný oryndary men kórkeıtilgen qoǵamdyq keńistik bir aýmaqta toǵystyryldy. Bul Almatyda gastronomıalyq kósheler jelisin qurý aıasynda júzege asyrylǵan alǵashqy joba.
Qalanyń barlyq segiz aýdany da baǵdarlamalaryn daıyndady. Turǵyndar úshin konsertter, sporttyq jarystar, kórmeler, sheberdiń sabaqtary, otbasylyq jáne balalarǵa arnalǵan is-sharalar uıymdastyryldy.
