Almaty ákimdiginiń qoldaýymen Satbayev University bazasyndaǵy Eko-habta «Jıhazyńdy jasa» aksıasy ótti, - dep habarlaıdy alnews.
Qala turǵyndaryna plasık qaldyqtarynyń daıyn buıymdarǵa qalaı aınalatyny kórsetilip, jobaǵa qatysý sharttary túsindirildi. Bul týraly «Eco Almaty» JSHS ókilderi habarlady.
İs-sharaǵa Almaty qalasy Ekologıa jáne qorshaǵan orta basqarmasynyń basshysy Serik Ádilbaev, URBIO zaýytynyń ókilderi, sondaı-aq ECO Network pen Eko-habtardyń negizin qalaýshy Evgenıı Mýhamedjanov qatysty. Olar qaıta óńdeletin shıkizatty óńdeý baǵytyndaǵy birlesken jumystar týraly aıtyp berdi. Aksıa jeńimpazdary tájirıbesin bólisip, syılyqtarǵa ıe boldy.
Joba shartyna sáıkes, turǵyndar paıdalanylǵan plasık jemis jáshikterin Eko-habtarǵa tapsyra alady. Jınalǵan shıkizat ECO Network sıfrlyq platformasynda esepke alynady. Qajetti kólem jınalǵannan keıin ony jıhazǵa jáne basqa da buıymdarǵa aıyrbastaýǵa bolady.
Almatyda mundaı óndiris qazirdiń ózinde jumys istep tur. Máselen, oqýshylar jınaǵan 120 myńnan astam plasık qaqpaqtan «Ońtústik» saıabaǵyna arnalǵan 11 oryndyq jasaldy. Oǵan shamamen 250 keli plasık jumsalǵan.
2024 jyldan beri «Meıirimdi qaqpaqsha» jobasy aıasynda almatylyqtar mıllıonnan astam qaqpaq jınaǵan. Olardan shahmat jıyntyqtary, salpynshaqtar, shyrsha oıynshyqtary jáne basqa da buıymdar jasalady.
Qalada ECO Network jelisiniń eki Eko-haby jumys isteıdi. Olar Markov kóshesinde jáne Satbayev University bazasynda ornalasqan. Munda qaıta óńdeýge bolatyn túrli qaldyqtar qabyldanyp, ekologıalyq aksıalar ótkiziledi. Sondaı-aq kelýshilerge qaldyqtardy qaıta paıdalaný tehnologıasy tanystyrylady.
