Almatyda 2026 jyly alǵashqy toǵyz aıda qalalyq jumyspen qamtý baǵdarlamalarynyń kómegimen 21,7 myń jas jumysqa ornalasty, - dep habarlaıdy alnews.
Olardyń 3,9 myńy NEET sanatyndaǵy jastar bolsa, taǵy 9,6 myńy jańa kásibı daǵdy meńgerdi. Jumys istemeıtin, oqymaıtyn jáne kásibı daıarlyqtan ótpeıtin jastarǵa, ıaǵnı NEET sanatyna erekshe kóńil bólinedi. Bul týraly Almaty qalasy Jastar saıasaty basqarmasynyń ókilderi habarlady.
Birinshi jartyjyldyqtyń qorytyndysy boıynsha Almatydaǵy NEET sanatyndaǵy jastardyń úlesi 2025 jylǵy 5,8%-dan 4,8%-ǵa deıin tómendedi. Bul sanatqa shamamen 33,6 myń adam jatady. Al jastar arasyndaǵy jumyssyzdyq deńgeıi osy kezeńde 3,8% boldy. Salystyrý úshin, 2024 jyly bul kórsetkish 4,4% bolǵan.
Almatyda 14 pen 35 jas aralyǵyndaǵy 769 myń jas turady. Onyń ishinde 332,6 myńy jaldamaly jumysta isteıdi, 34 myńy ózin-ózi jumyspen qamtyǵan. Joǵary oqý oryndarynda 232,8 myń, kolejderde 89,6 myń jas bilim alyp jatyr.
Jastardyń jumysqa ornalasýyna kómektesý úshin qalalyq Jastardyń mansap ortalyǵy jumys isteıdi. Munda jumys berýshilermen kezdesýler, bos jumys oryndary jármeńkeleri, taǵylymdamalar men eńbek jolyn endi bastaǵan jastarǵa arnalǵan tájirıbelik baǵdarlamalar uıymdastyrylady.
Ortalyqtyń kómegimen 4 myń adam jumysqa ornalasty. Olardyń 1,2 myńy – NEET sanatyndaǵy jastar. Budan bólek, Almatynyń 2,1 myń jas turǵyny ýaqytsha jumys oryndaryna ornalastyryldy.
Kásibı daıarlyqqa baǵyttalǵan bastamalardyń biri Skill All jobasy. Onyń aıasynda marketıń, IT, jumysshy mamandyqtary jáne qyzmet kórsetý salalary boıynsha bilim alýǵa bolady. Kúndizgi kýrstardan 2 myń adam, al qashyqtan oqytý baǵdarlamalarynan 7,6 myń adam ótti. Qazirgi ýaqytta onlaın formatta 92 oqý baǵdarlamasy qoljetimdi.
Bos jumys oryndary men qoldaý sharalary týraly aqparatty Jasalmaty.kz sıfrlyq platformasynan tabýǵa bolady. Platformany 25 myń biregeı paıdalanýshy qoldanǵan. Qazir onda 1,3 myńǵa jýyq bos jumys orny usynylǵan.
Jumysqa ornalasýda qıyndyqtarǵa tap bolǵan jastarmen jeke jumys ta júrgiziledi. Mamandar olardyń qajettiligin anyqtaý úshin 10 myń adammen baılanys ornatqan. Olardyń 1 681-i jumys izdeýge kómekke muqtaj bolsa, al 421 úmitkerge jeke qoldaý kórsetilip jatyr.
Jastar saıasaty basqarmasynyń málimetinshe, negizgi máselelerdiń biri kolejder men joǵary oqý oryndarynyń túlekterinde eńbek tájirıbesiniń bolmaýy jáne alǵan mamandyǵynyń jumys berýshiler talaptaryna sáıkes kelmeýi. Sondyqtan jastarǵa bos jumys oryndaryn usynýmen qatar, taǵylymdamadan ótýge, qysqa merzimdi kýrstarǵa qatysýǵa jáne alǵashqy kásibı tájirıbe jınaýǵa múmkindik beriledi.
