Almatyda Premer-mınıstrdiń orynbasary – Mádenıet jáne aqparat mınıstri Aıda Balaevanyń tóraǵalyǵymen shyǵarmashylyq zıaly qaýym ókilderi «Ádiletti jáne Progresıvti Qazaqstannyń Halyqtyq Konstıtýsıasy úshin!» jalpyulttyq koalısıasy múshelerimen kezdesti, - dep habarlaıdy alnews.
İs-sharaǵa depýtattar, áleýmettanýshylar, otandyq kıno jáne mýzeı salasynyń ókilderi, shyǵarmashylyq birlestikter, medıaqaýymdastyq jáne kreatıvti uıymdar qatysty.
Jıyn jańa Konstıtýsıa jobasyna jáne 15 naýryzǵa josparlanǵan respýblıkalyq referendýmǵa arnaldy. Kezdesýde Aıda Balaeva Ata zań jobasynda adamı kapıtalǵa aıryqsha mán berilgenin, al mádenıet pen tarıhı murany saqtaý jańartylǵan Konstıtýsıada joǵary deńgeıge kóterilgenin atap ótti.
«Bilim, ǵylym, mádenıet jáne ınovasıa salalaryna erekshe mán berilip, ulttyq mádenıetti qoldaý men tarıhı-mádenı murany saqtaý konstıtýsıalyq qaǵıdat deńgeıine kóterildi. Bul memlekettiń bolashaǵy tabıǵı resýrstarǵa ǵana emes, eń aldymen bilimdi, zıatkerlik áleýeti joǵary azamattarǵa súıenetinin kórsetedi. Sóz joq, ulttyq mádenıetti qoldaý jáne tarıhı-mádenı murany saqtaý uǵymdarynyń alǵash ret konstıtýsıalyq deńgeıde bekitilýi biz úshin úlken qýanysh ári zor jaýapkershilik. Sondaı-aq el azamattary tarıhı jáne mádenı muranyń saqtalýyna qamqor bolýǵa, tarıh pen mádenıet eskertkishterine uqypty qaraýǵa mindetti ekeni de anyq kórsetilgen. Atalǵan jańashyldyq ulttyq biregeılikti nyǵaıtýǵa, tarıhı sabaqtastyqty saqtaýǵa jáne ulttyq kod pen mádenı murany keler urpaqqa jetkizýge jol ashady», – dedi Aıda Balaeva.
Medıamenedjer, Qazaqstannyń eńbek sińirgen qaıratkeri Nurjan Muhamedjanova joba zań ústemdigi men qoǵamdyq qatysý qaǵıdattaryn kúsheıtetinin, sonyń ishinde sıfrlyq ortadaǵy azamattardyń quqyǵyn qorǵaýǵa kepildik beretinin aıtty.
Otyrysta rejıser Talǵat Temenov el úshin mańyzdy kezeńde ár azamattyń jaýapkershiligi arta túsetinin atap ótti.
«El tarıhynda Konstıtýsıa alǵash ret qazaq tilinde jazyldy. Men osyǵan qýandym. Ekinshi qýanǵanym, bir palataly parlament ıaǵnı Quryltaıdy qurý bastamasy boldy. Úshinshi, prezıdenttiń bir-aq márte saılanýy. Ata zańnyń ár tarmaǵy – qazaqtyń erteńi, úmiti men bolashaǵy. Keler urpaq úshin birigip, referendýmǵa qatysýymyz óte mańyzdy», – dedi ol.
Kıno prodúseri Jalyn Tileýbergen jańa Konstıtýsıa jobasy kreatıvti ekonomıka men kreatıvti ındýstrıany damytý baǵytyn aıqyndaıtynyn jetkizdi.
«Konstıtýsıalyq deńgeıde sóz bostandyǵyna, ǵylymı, tehnıkalyq jáne kórkem shyǵarmashylyq erkindikke kepildik berilip, zıatkerlik menshik qorǵalsa, bul jas rejıserler men akterler úshin berik tirek bolar edi. Basty resýrs – shıkizat emes, azamattardyń ıdeıasy, oıy, daryny men eńbegi. Al referendýmǵa qatysý óner men qoǵam arasyndaǵy baılanysty kúsheıtetini anyq», – dedi ol.
Kezdesý sońynda koalısıa músheleri qatysýshylarmen pikir almasyp, oıyn ortaǵa saldy. Bıyl 15 naýryz kúni azamattar jańa Konstıtýsıa jobasy boıynsha óz ustanymyn bildiretinin aıtty.
