Almatyda aldaǵy respýblıkalyq referendýmǵa arnalǵan kezdesýler men dıalog alańdary jalǵasyp jatyr. Abaı atyndaǵy Qazaq ulttyq pedagogıkalyq ýnıversıtetinde «Ádiletti jáne progresıvti Qazaqstannyń Halyq Konstıtýsıasy úshin!» jalpyulttyq koalısıa ókilderi oqý orny ujymymen kezdesti, - dep habarlaıdy alnews.
İs-sharaǵa Májilistiń Halyqaralyq ister, qorǵanys jáne qaýipsizdik komıtetiniń tóraǵasy Aıgúl Quspan, Almaty qalalyq máslıhatynyń tóraǵasy Meırjan Otynshıev, «Jastar rýhy» jastar qanatynyń tóraǵasy Dıdar Dildábek jáne AMANAT partıasynyń Medeý aýdandyq fılıalynyń jetekshisi Erjan Medeýova qatysty.
Kezdesý barysynda qatysýshylar referendýmnyń mańyzy men azamattardyń memlekettik sheshim qabyldaýdaǵy rólin talqylady.
"Referendýmǵa qatysý — azamattyq jaýapkershiliktiń mańyzdy kórinisi", — dedi Aıgúl Quspan.
Kezdesýge qatysýshylar respýblıkalyq referendým ótkizýdi qoldaıtynyn bildirdi.
Túsindirý kezdesýi «Stal Servıs» kompanıasynyń eńbek ujymymen de ótti. İs-sharaǵa Almaty qalalyq máslıhatynyń depýtattary jáne qoǵamdyq qurylym ókilderi qatysty.
Kezdesý barysynda aldaǵy daýys berýdiń qoǵamdyq mańyzyna qatysty máseleler kóterildi.
"Belsendi azamattyq ustanym jáne referendýmǵa qatysý eldiń damýy úshin qaǵıdatty mánge ıe", — dedi Almaty qalalyq máslıhatynyń depýtaty Dýlat Tastekeı.
Aldaǵy referendýmdy talqylaý Qazaqstan halqy Assambleıasy janyndaǵy «Assambleıa jastary» aktıviniń dıalog alańynda da jalǵasty. Medeý aýdanynyń komúnıtı-ortalyǵynda ótken jıynǵa jastar uıymdarynyń, stýdentter qaýymynyń jáne qoǵamdyq ınstıtýttardyń ókilderi qatysty.
"Jastar qoǵamdyq-saıası úderisterge belsendi qatysýǵa tıis", — dedi QHA múshesi ári Almaty qalasynyń Qoǵamdyq keńesiniń múshesi Rýstam Qaıryev.
Kezdesýlerge qatysýshylar respýblıkalyq referendým ótkizýdi qoldaıtyndaryn jetkizdi.
Eske salaıyq, Memleket basshysynyń Jarlyǵyna sáıkes, 15 naýryzda Qazaqstanda jańa Konstıtýsıany qabyldaý boıynsha respýblıkalyq referendým ótkizý josparlanǵan.
