Almaty ákiminiń orynbasary Abzal Núkenov Ulybrıtanıa Qaýymdar palatasy Qorǵanys komıtetiniń tóraǵasy Tan Desı bastaǵan Ulybrıtanıa Parlamenti delegasıasymen kezdesti, - dep habarlaıdy alnews.
Kezdesýge Ulybrıtanıanyń Qazaqstandaǵy Elshisi Sallı Aksýorsı de qatysty.
Kezdesýdiń negizgi taqyryptarynyń biri brıtandyq bıznesti qalalyq jobalarǵa tartý boldy. Búginde Almatyda brıtandyq kapıtaly bar 256 kásiporyn tirkelgen. Olar kásibı jáne ǵylymı-tehnıkalyq qyzmet, saýda, qarjy jáne basqa da salalarda jumys isteıdi.
«Almaty polıortalyqtyq damý modeli aıasynda jańa ósý núktelerin qalyptastyryp keledi. Biz brıtandyq bıznespen qalalyq ınfraqurylym, kólik, development, qonaq úı bıznesi, jasyl ekonomıka jáne zamanaýı tehnologıa salalarynda yntymaqtastyq ornatýǵa múmkindik bar dep sanaımyz», – dedi Abzal Núkenov.
Taraptar týrısik baılanysty damytý máselesin de talqylady. 2026 jyldyń birinshi jartyjyldyǵynda Almatyǵa Ulybrıtanıadan 7 myńnan astam týrıs keldi. Bul ótken jyldyń osy kezeńimen salystyrǵanda 16,5%-ǵa kóp. Múmkindigi joǵary baǵyttardyń qatarynda taý týrızmi, tıisti ınfraqurylymdy damytý jáne tájirıbe almasý bar.
Kelissózderdiń jeke bóligi bilim berý jáne ınovasıa salasyna arnaldy. Almatyda búginde Coventry University kampýsy jumys isteıdi. Onda ınjenerlik jáne kompúterlik ǵylymdar, jasandy ıntellekt jáne sáýlet baǵyttary boıynsha bilim berý baǵdarlamalary usynylǵan.
Queen’s University Belfast, SOAS University of London, University of London, De Montfort University jáne basqa da brıtandyq joǵary oqý oryndarymen birlesken akademıalyq jobalar júzege asyrylyp jatyr.
Kezdesý sońynda taraptar Almaty men Ulybrıtanıanyń iskerlik jáne akademıalyq ortasy arasyndaǵy tikeleı baılanysty jalǵastyrýǵa ýaǵdalasty.
