Almatyda ákimshilik quqyq buzýshylyqtar boıynsha ustalǵan kólik quraldaryn evakýasıalaý jáne mamandandyrylǵan aıyppul turaqtarynyń qyzmetin retteýdiń jańa tásilderi qarastyrylýda, - dep habarlaıdy alnews.
Usynylyp otyrǵan sharalar rásimderdiń ashyqtyǵyn arttyrýǵa, mamandandyrylǵan turaqtardyń jumysyn biryńǵaı júıege keltirýge jáne kólik quraldaryn evakýasıalaý tetikterin jetildirýge baǵyttalǵan.
Ózgeristerdiń negizgi maqsattarynyń biri – jol qozǵalysy erejelerin buzýdyń aldyn alý jáne júrgizýshilerdiń jaýapkershiligin arttyrý. Osy maqsatta ustalǵan kólik quraldaryn evakýasıalaý men saqtaý boıynsha biryńǵaı tártip engizý, sondaı-aq atalǵan qyzmetterge ekonomıkalyq turǵydan negizdelgen tarıfter belgileý usynylady.
Qazirgi ýaqytta kólik quralyn evakýasıalaý tarıfin 6 aılyq eseptik kórsetkish (AEK) mólsherinde belgileý máselesi qarastyrylýda. Aıyppul turaqtarynda saqtaý quny kólik quralynyń sanatyna qaraı aıqyndalady: motosıklder men eki dońǵalaqty kólikter úshin 1 AEK-ten bastap, salmaǵy 12 tonnadan asatyn iri gabarıtti kólik quraldary úshin alǵashqy táýlikke 4,5 AEK-ke deıin belgileý usynylady. Bul rette kólik quraly mamandandyrylǵan turaqqa qoıylǵan kún úshin tólem alynbaıdy.
Sondaı-aq evakýasıa qyzmeti úshin tólemnen bosatylatyn jaǵdaılar da qarastyrylǵan. Atap aıtqanda, tótenshe jaǵdaılar kezinde nemese kólik quraly aıyppul turaǵyna jetkizilmeı basqa orynǵa ǵana jyljytylǵan jaǵdaıda evakýasıa úshin aqy alynbaıdy.
Kútilip otyrǵan ózgerister jol qozǵalysy erejeleriniń toqtaý jáne turaqqa qoıý talaptaryn buzý jaǵdaılaryn azaıtýǵa, júrgizýshiler tártibin arttyrýǵa, kólik quraldarynyń saqtalýyn qamtamasyz etýge, evakýasıalaý jáne saqtaý qyzmetterin kórsetýdiń biryńǵaı standarttaryn qalyptastyrýǵa, sondaı-aq júıeni azamattar úshin anaǵurlym túsinikti ári qolaıly etýge múmkindik beredi.
