Almatyda jastar táýliktiń kez kelgen ýaqytynda bilim alyp, jobasymen aınalysyp, kontent jasap, pikirles jandarmen tanysa alatyn jańa keńistik paıda bolady, - dep habarlaıdy alnews.
Bostandyq aýdanynda jastarǵa arnalǵan alǵashqy táýlik boıy jumys isteıtin komúnıtı ortalyq ashyldy. Bul qalalyq ınfraqurylymdy táýlik boıy qoljetimdi etýge baǵyttalǵan «Uıyqtamaıtyn qala» tujyrymdamasyn júzege asyrý jolyndaǵy naqty qadamdardyń biri.
Buǵan deıin Qazaqstan Prezıdenti Qasym-Jomart Toqaev Almatyny táýlik boıy tirshiligi toqtamaıtyn qala retinde damytý mindetin aıqyndaǵan bolatyn. Memleket basshysy megapolısti turǵyndar, bıznes ókilderi men jastar úshin jańa múmkindikter usynatyn, táýlik boıy jumys isteıtin tartymdy ortalyq retinde damytýǵa erekshe nazar aýdardy.
Almaty ákimi Darhan Satybaldy zamanaýı qalalyq ınfraqurylymdy damytýǵa, jastar úshin qolaıly jaǵdaı jasaýǵa jáne olardyń ózin-ózi júzege asyrý múmkindikterin keńeıtýge aıryqsha kóńil bólip keledi. Qala saıasatynyń basym baǵyttarynyń biri jastar jańa bilim alyp, kásibı daǵdysyn damytyp, bastamalaryn júzege asyryp, pikirles jandardy taba alatyn qoljetimdi qoǵamdyq keńistikter qalyptastyrý. Táýlik boıy jumys isteıtin komúnıtı ortalyqtyń ashylýy osy baǵyttaǵy taǵy bir mańyzdy qadam bolmaq. Bul jastarǵa megapolıs múmkindikterin táýliktiń kez kelgen ýaqytynda paıdalanýǵa jol ashady.
«Táýlik boıy jumys isteýge negizdelgen jańa tásil endi jastar ınfraqurylymynda da jalǵasyn tabýda. Óıtkeni qazirgi ómir yrǵaǵy áldeqashan tańǵy toǵyzdan keshki altyǵa deıingi qalypty jumys kestesimen shektelmeıdi. Stýdentter túnde emtıhanǵa daıyndalady, jas kásipkerler sabaqtan keıin startap jobalarymen aınalysady, al shyǵarmashylyq mamandyq ıeleri kóbine shabytty tún ortasynan keıin tabady. Jańa komúnıtı ortalyq dál osyndaı jastar úshin ýaqyt ıdeıasyn damytýǵa jáne júzege asyrýǵa kedergi bolmaıtyn orynǵa aınalýǵa tıis», – dedi Jastar saıasaty basqarmasynyń basshysy Azız Kajdenbek.
Ortalyq Rozybakıev kóshesi, 247/7 mekenjaıynda ornalasqan. Jalpy aýmaǵy 450 sharshy metr bolatyn úsh qabatta bilim berý, mansaptyq damý, sıfrlyq tehnologıa, shyǵarmashylyq jáne qoǵamdyq baǵyttar biriktirilgen. Keńistiktiń basty erekshelikteriniń biri ıdeıadan bastap ony is júzinde júzege asyrýǵa deıingi barlyq kezeńnen bir jerde ótýge múmkindik bolýynda.
Mysaly, bolashaq mamandyǵyn áli tańdamaǵan jastar kásibı baǵdar boıynsha keńes ala alady. Al jumys izdep júrgenderge túıindeme ázirleýge, suhbattasýǵa daıyndalýǵa jáne bos jumys oryndaryn tabýǵa kómektesedi. Qalalyq mansap ortalyǵynda jumys berýshilermen tikeleı baılanys ornatýǵa múmkindik qarastyrylǵan. Ashylý rásimine qatysqan seriktester qatarynda HeadHunter, Alatau City Bank, JETI Group, Attractor School jáne basqa da uıymdar bar.
Tehnologıalarǵa qyzyǵatyn jastar úshin Game Dev Zone aımaǵy jumys isteıdi. Munda kompúterlik oıyndar ázirleý, baǵdarlamalaý, vırtýaldy keńistikter qurý jáne sıfrlyq dızaın baǵyttarymen tanysýǵa bolady. Aldaǵy ýaqytta bul alańda tájirıbelik sabaqtar, hakatondar men komandalyq jobalar uıymdastyrý josparlanyp otyr.
Shyǵarmashylyq ındýstrıalarǵa da erekshe kóńil bólingen. Ortalyqta podkast jazýǵa arnalǵan stýdıa men Media Room jabdyqtalǵan. Munda jastar suhbat jazyp, beınerolıkter túsirip, áleýmettik jelilerge arnalǵan materıaldar ázirlep, jeke brendin damytyp, kásibı portfolıosyn qalyptastyra alady.
Taǵy bir mańyzdy baǵyt – psıhologıalyq qoldaý. Jastar mamannan jeke keńes alyp, ózderin tolǵandyratyn máselelerdi, ózin-ózi taný men kásibı damý baǵytyndaǵy máselelerdi talqylaı alady.
Ortalyqta ashyq dárister men pikirtalastar ótkizýge arnalǵan amfıteatr, sabaq oqyp, birlesip jumys isteýge arnalǵan kovorkıng jáne beıresmı kezdesýlerge, áńgimelesýge, jańa jobalardy talqylaýǵa arnalǵan Kitchen Room keńistigi de bar.
Uıymdastyrýshylardyń josparyna sáıkes, atalǵan baǵyttardyń barlyǵy birtutas júıe retinde jumys isteýge tıis. Osylaısha, jastar bir jerde bilim alyp, komandasyn quryp, qajetti daǵdy meńgerip, jumysqa ornalasý nemese jeke kásibin bastaý jolyndaǵy alǵashqy qadamyn jasaı alady.
«Jastarǵa arnalǵan táýlik boıy jumys isteıtin keńistiktiń ashylýy Almatyny damytýdaǵy aýqymdy kózqarasty kórsetedi. «Uıyqtamaıtyn qala» tujyrymdamasy megapolıstiń ómir súrý yrǵaǵy ártúrli turǵyndar úshin qoljetimdi ári jaıly bolýyn kózdeıdi. Bilim alý, jumys isteý jáne ózin-ózi júzege asyrý múmkindikteri tek táýlik ýaqytyna táýeldi bolmaýǵa tıis. Bul rette jańa ortalyqtyń basty mindeti – jastarǵa kezdesýge nemese bilim alýǵa arnalǵan oryn usyný ǵana emes, jańa bastamalardyń, kásibı múmkindikter men birlesken jobalardyń paıda bolýyna jaǵdaı jasaý», – dedi Azız Kajdenbek.
Kóptegen ýnıversıtet, kolej, bilim berý jáne shyǵarmashylyq uıym shoǵyrlanǵan Almatyda mundaı format stýdentter, eńbek jolyn endi bastaǵan mamandar, kásipkerler men kreatıvti ındýstrıa ókilderi úshin suranysqa ıe alańǵa aınalýy múmkin. Negizgi ıdeıa qarapaıym: eger jastyń bilim alýǵa, jańa dúnıe jasaýǵa jáne damýǵa degen yntasy bolsa, tipti, jarym túnde de qala oǵan osyndaı múmkindik usynýǵa tıis.
