Almaty quramasy sýrdlımpıadalyq sport túrlerinen Qazaqstan Respýblıkasynyń IV Spartakıadasynda jalpykomandalyq esepte birinshi oryn aldy, - dep habarlaıdy alnews.
Qala sportshylary jarysty 92 medalmen aıaqtady: 29 altyn, 31 kúmis jáne 32 qola. Bul týraly Almaty qalasy Sport basqarmasynyń ókilderi habarlady.
Respýblıkalyq Spartakıada 10-25 tamyz aralyǵynda Almatyda, Almaty oblysynda jáne Oralda ótti. Jarysqa elimizdiń 19 óńirinen 1500-den astam sportshy qatysty. Sporttyń 10 túrinen 274 medal jıyntyǵy sarapqa salyndy.
Spartakıada qorytyndysy boıynsha Almaty quramasy 228 upaı jınap, jalpykomandalyq esepte jeńimpaz atandy. 186 upaımen Jambyl oblysy ekinshi oryn alsa, 155 upaı jınaǵan Astana úzdik úshtikti túıindedi.
Almatylyq sportshylar on sport túriniń toǵyzynda komandalyq júldege ıe boldy. Qala quramasy grek-rım kúresi, badmınton, shahmat jáne jeńil atletıkadan birinshi oryn aldy. Ústel tenısi, dzúdo jáne taekvondodan ekinshi, al erkin kúres pen fýtboldan úshinshi oryn ıelendi.
Almatylyq sportshylar ásirese, jeńil atletıkada joǵary nátıje kórsetti. Úsh jarys kúniniń qorytyndysy boıynsha komanda 8 altyn, 9 kúmis jáne 4 qola medal jeńip alyp, osy sport túrinen jalpykomandalyq esepte birinshi orynǵa ıe boldy.
Jalpy alǵanda, Almaty sportshylarynyń enshisinde 92 medal bar. Spartakıada tórt jylda bir ret ótkiziledi jáne sýrdlımpıadalyq sportty damytýǵa, estý qabileti buzylǵan sportshylardyń sheberligin arttyrýǵa, sondaı-aq ulttyq qurama sapyna úzdik sportshylardy irikteýge baǵyttalǵan.
