Qazaqstannyń eń iri qalasy ári burynǵy astanasy Almaty Ortalyq Azıadaǵy basty gastronomıalyq baǵyttardyń biri retinde tanyldy. Amerıkanyń bedeldi Eater basylymy qalany 2026 jylǵa arnalǵan «Where to Eat» – taǵamsúıer qaýym mindetti túrde barýy tıis baǵyttar tizimine engizdi. Bul týraly Almaty qalasy Týrızm basqarmasynyń ókilderi habarlady.
Eater – meıramhanalar men gastronomıa týraly álemdegi eń yqpaldy basylymdardyń biri. Onyń tizimine ený qalanyń halyqaralyq tanymaldylyǵyn arttyryp, gastronomıalyq týrızmniń damýyna oń yqpal etedi.
Basylymnyń baǵalaýynsha, sońǵy jyldary Almaty óńirdiń mańyzdy aspazdyq ortalyǵyna aınaldy. Munda Ortalyq Azıanyń túkpir-túkpirinen kelgen bas aspazdardyń basyn qosqan alǵashqy Almaty Food Fest festıvali ótti jáne qalanyń alǵashqy resmı gastronomıalyq gıdi jaryq kórdi. Almatynyń taǵam mádenıeti kóshpeli qazaq dástúrlerin uıǵyr, orys, ózbek, koreı, túrik jáne úndi aspazdyq ónerimen úılestire bilgen. Et, qazy, samsa, baýyrsaq pen laǵman sıaqty ulttyq taǵamdar osy mádenı alýandyqtyń jarqyn kórinisi sanalady. Dástúrli dámderdi áli de Kók bazardan tabýǵa bolady, al neo-kóshpeli baǵyttaǵy meıramhanalar olardy zamanaýı úlgide usynady.
Eater Almatydaǵy shaı ishý mádenıetine de erekshe toqtalǵan. Basylymnyń jazýynsha, qala dastarhanynda sháınek árdaıym tórde turady. Sondaı-aq, týrıserge sábiz qosylǵan palaý men qazynyń dámin tatyp kórýge keńes beredi. Buǵan qosa, jergilikti taǵamdardy usynatyn meıramhanalar jelisiniń kóptigi saıahatshylardyń qazaq asqanasymen ońaı tanysýyna múmkindik beretini aıtylǵan.
