«ALMATY CIRCUS FESTIVAL»: 16 el, 55 jyldyq dástúr jáne Qazaq memlekettik sırk arenasyndaǵy biregeı óner kórsetilimderi
Almaty taǵy bir márte sırk óneriniń halyqaralyq astanasyna aınalady. Qalada 2025 jylǵy 23-27 shilde aralyǵynda Almaty qalasy ákimdiginiń qoldaýymen III Halyqaralyq ALMATY CIRCUS FESTIVAL festıvali ótedi.
Aýqymdy shara Qazaq memlekettik sırkiniń 55 jyldyq mereıtoıyna arnalady – bul mekeme qala mádenıetiniń nyshanyna aınalǵan, óz dástúri men áıgili ártisterimen tanymal.
Qysqa ýaqyt ishinde ALMATY CIRCUS FESTIVAL álemdik úzdik on sırk festıvaliniń qataryna endi. Ony bedeldi básekelestik deńgeıi, halyqaralyq qatysýshylar quramy jáne sheberlik, shabyt pen mádenı ártúrlilik úılesken ózgeshe atmosferasy ereksheleıdi. Bıylǵy jyly uıymdastyrý komıtetine 20 elden 180-nen astam ótinim kelip tústi. Aqtyq kezeńge 16 memleketten úzdik nómirler iriktelip alyndy.
«Osyndaı festıváldiń ótkizilýi Almatynyń Ortalyq Azıadaǵy mádenı hab retindegi bedelin nyǵaıtady. Bul – halyqaralyq yntymaqtastyqqa, jastardy damytýǵa jáne dástúrlerimizdi saqtaýǵa qosylǵan úles. Almaty álemniń úzdik sırk ártisterin bir arenada biriktiredi», – dep atap ótti Qazaq memlekettik sırkiniń dırektory Maqsat Jaıyqov.
Baǵdarlama áýe akrobatıkasynan bastap teatrlanǵan saıqymazaqtarǵa deıin sırk óneriniń barlyq janryn qamtıdy. Fransıa, Belgıa, Argentına, Qytaı, Vetnam, Mońǵolıa, Reseı, Ýkraına, Belarýs, Ózbekstan, Qyrǵyzstan, Izraıl jáne Efıopıadan kelgen ártister Almatyǵa ózderiniń úzdik qoıylymdaryn alyp keledi. Qazaqstan atynan «Hassak» trýppasy óner kórsetedi, olar sırktiń mereıtoıyna arnaıy daıyndalǵan erekshe trúkti, ıaǵnı áıgili Ábishevter áýletine qurmet retinde úshtik akrobatıkalyq ıyqqa kóterý trúgin alǵash ret oryndaıdy. Bul nómir urpaqtar sabaqtastyǵynyń sımvoly bolmaq.
Buǵan deıin halyqaralyq konkýrstarda kórsetilmegen óner kórsetilimderine erekshe nazar aýdarylǵan. Solardyń qatarynda – Ýkraınadan kelgen dýettiń «Jan syry» atty áýe dramasy, sondaı-aq álemge tanymal, álemdegi úzdik bes saıqymazaqtyń biri sanalatyn Germanıalyq Hýsh-Ma-Hýshtyń fılosofıalyq saıqymazaǵy bar. Onyń sahnalyq tili – ıýmor men absýrd teatrynyń úılesimi. Bul qoıylymdar sırk óneriniń kórermenderi úshin naǵyz jańalyq bolmaq.
Qazylar alqasynyń quramy da erekshe: oǵan tek sheteldik óner qaıratkerleri ǵana emes, sonymen qatar otandyq sırk ardagerleri de kiredi.
«Sırk festıvali – bul jaı ǵana baıqaý emes. Bul – shyǵarmashylyq zerthana, mádenı suhbat jáne urpaqtar arasyndaǵy kópir. Biz kórermenderge tanymal sheberlerdi ǵana emes, esh jerde kórsetilmegen nómirlerdi usynýymyzben de erekshe maqtanamyz», – dedi festıváldiń bas rejıseri Marına Redko.
Aıta keteıik, Almaty turǵyndary men qala qonaqtary 23-27 shilde aralyǵynda kún saıyn saǵat 18:00-de ótetin kásibı sheberlikke, batyldyqqa jáne rekordtyq trúkterge toly umytylmas shoýdy tamashalaı alady. «ALMATY CIRCUS FESTIVAL» jeńimpazdary men fınalısteriniń qatysýymen ótetin festıváldik baǵdarlama 2025 jyldyń 24 tamyzyna deıin jalǵasady.
