Алматы қаласында халықтың әлеуметтік осал топтарын тұрғын үймен қамтамасыз ету бағытындағы жұмыстар жүйелі түрде жалғасуда, - деп хабарлайды alnews.
Осы мақсатта Алматы қаласының Құрылыс басқармасы әлеуметтік осал санаттағы азаматтарды тұрғын үймен қамтамасыз ету үшін 6 353 пәтерді сатып алуды жоспарлаған. Бұл туралы Өңірлік коммуникациялар қызметінде өткен баспасөз конференциясында Құрылыс басқармасының басшысы Нұрбол Нұрсағатов мәлімдеді.
Бүгінгі таңда 2 717 пәтер уәкілетті органның теңгеріміне берілді. Тағы 640 пәтерді қабылдап алу жұмыстары жүргізілуде, олар бойынша қабылдау-тапсыру актілеріне қол қойылған. Жыл соңына дейін барлық пәтерді уәкілетті органның теңгеріміне толық беру жоспарланып отыр.
Сонымен қатар, Қазақстан Республикасының 2029 жылға дейінгі тұрғын үй-коммуналдық инфрақұрылымды дамыту тұжырымдамасы аясында әлеуметтік кредиттік тұрғын үй құрылысы жалғасуда.
Қазіргі уақытта 2 246 пәтерге арналған 29 көппәтерлі тұрғын үйдің құрылысы жүргізілуде.
Бүгінде 1 366 пәтерді қамтитын 17 көппәтерлі тұрғын үйдің құрылысы толық аяқталды.
Оның ішінде:
• 7 тұрғын үй «Қалқаман-2» шағын ауданында;
• 10 тұрғын үй «Жас-Қанат» шағын ауданында орналасқан.
Қазіргі уақытта пайдалануға дайын тұрғын үйлер бойынша техникалық паспорттарды рәсімдеу жұмыстары жүргізілуде.
Ал «Жас-Қанат» шағын ауданындағы 880 пәтерге арналған қалған 12 көппәтерлі тұрғын үйдің құрылысын 2027 жылдың II тоқсанында аяқтау жоспарланып отыр.
