الماتىدا جاڭا وقۋ جىلى قارساڭىندا مەكتەپتەر مەن بالالار مەكەمەلەرىنىڭ قاۋىپسىزدىگى تەكسەرىلىپ جاتىر، - دەپ حابارلايدى alnews.
قالالىق بالالاردىڭ قۇقىقتارىن قورعاۋ جونىندەگى ۆەدومستۆوارالىق مونيتورينگ توبى قوعامدىق كەڭەس پەن قوعامدىق ۇيىمدار وكىلدەرىمەن بىرگە قالاداعى نىسانداردىڭ جاڭا وقۋ جىلىنا دايىندىعىن تەكسەرۋدە.
اۋقىمدى جۇمىستىڭ باستى ماقساتى – بالالاردىڭ قۇقىقتارى مەن زاڭدى مۇددەلەرىن قورعاپ، ءبىلىم بەرۋ ۇيىمدارىنىڭ جاڭا وقۋ جىلىنا جان-جاقتى دايىندىعىن قامتاماسىز ەتۋ جانە ءاربىر بالا ءۇشىن ءقاۋىپسىز ءارى قولايلى ورتا قالىپتاستىرۋ.
بۇل جولعى مونيتورينگ تەك قاجەت قۇجاتتار مەن جابدىقتاردىڭ بار-جوعىن فورمالدى تۇردە تەكسەرۋمەن شەكتەلمەيدى. ماماندار ءبىلىم بەرۋ ۇيىمدارىنىڭ ناقتى جۇمىسقا دايىندىعىنا، قولجەتىمدىلىگىنە جانە قاۋىپسىزدىك جۇيەلەرىنىڭ ءىس جۇزىندە قالاي جۇمىس ىستەيتىنىنە جان-جاقتى باعا بەرۋدە. وسى ماقساتتا الماتىنىڭ ءار اۋدانىندا ارنايى سەگىز مونيتورينگ توبى قۇرىلىپ، جۇمىسقا كىرىستى.
الماتى قالاسى بالالاردىڭ قۇقىقتارىن قورعاۋ باسقارماسىنىڭ باسشىسى جانات ايتپايەۆا مونيتورينگ بارىسىندا كەشەندى قاۋىپسىزدىك ماسەلەسىنە ەرەكشە باسىمدىق بەرىلەتىنىن جەتكىزدى.
– باستى مىندەتىمىز – جاڭا وقۋ جىلى قارساڭىندا ءاربىر بالانىڭ ءومىرى مەن دەنساۋلىعىنا قاتەر توندىرمەيتىن ءقاۋىپسىز ورتا قالىپتاستىرۋ. مونيتورينگ بارىسىندا بارلىق قاۋىپسىزدىك جۇيەسىنىڭ ناقتى جاعدايدا قالاي جۇمىس ىستەيتىنىن زەردەلەندى. ايتالىق، بەينەباقىلاۋ كامەرالارىنىڭ جازبالارى ارحيۆتە ساقتالۋ مەرزىمى كەمىندە 30 تاۋلىك بولۋى، دابىل تۇيمەلەرىنىڭ جەدەل ارەكەت ەتۋى، ءورت قاۋىپسىزدىگى تالاپتارىنىڭ ساقتالۋى باقىلاۋعا الىنعان. سونىمەن قاتار سپورت جانە ويىن الاڭدارىنداعى فۋتبول قاقپالارى مەن تۋرنيكتەر سەكىلدى كونسترۋكسيالاردىڭ بەرىكتىگى مەن تالاپقا ساي بەكىتىلۋىنە دە ەرەكشە نازار اۋدارىلۋدا، – دەدى باسقارما باسشىسى.
مونيتورينگ بارىسىندا ءبىلىم بەرۋ ۇيىمدارىنىڭ انتيتەرروريستىك قورعانىس جۇيەسى دە جان-جاقتى تەكسەرىلۋدە. اتاپ ايتقاندا، بەينەباقىلاۋ كامەرالارىنىڭ سوقىر ايماقتارسىز جۇمىس ىستەۋى، كۇزەت قىزمەتكەرلەرىنىڭ توتەنشە جاعداي كەزىندەگى ارەكەت ەتۋ الگوريتمى زەردەلەنەدى. سونداي-اق مەكتەپ اۋماعى مەن ينفراقۇرىلىمىنىڭ قاۋىپسىزدىگىنە باسىمدىق بەرىلگەن. ەلەكتر قاۋىپسىزدىگىنىڭ ساقتالۋى، ليۋكتەردىڭ جابىق بولۋى، وقۋشىلاردىڭ مەكتەپكە كەلىپ-كەتۋ باعىتتارىنىڭ قاۋىپسىزدىگى باقىلاۋعا الىنعان.
ەرەكشە ءبىلىم بەرۋ قاجەتتىلىكتەرى بار بالالار ءۇشىن جاسالعان جاعدايلار دا نازارعا الىندى. مونيتورينگ توپتارى پاندۋستاردىڭ، تۇتقالاردىڭ جانە قولجەتىمدى ەۆاكۋاسيا جولدارىنىڭ تالاپقا سايكەستىگىن تەكسەرۋدە.
بۇدان بولەك، بالالاردىڭ قيىن جاعدايدا جاسىرىن تۇردە كومەك الۋىنا مۇمكىندىك بەرەتىن «QR-111» اقپاراتتىق تاقتايشالارىنىڭ بەكىتىلگەن ديزاين-ماكەتتەرىنە سايكەس ورنالاستىرىلۋى دا زەردەلەنىپ جاتىر.
مونيتورينگ قورىتىندىسى بويىنشا انىقتالعان بارلىق كەمشىلىك تىركەلىپ، جاۋاپتى تۇلعالارعا ولاردى جەدەل جويۋ جونىندە ناقتى ۇسىنىمدار بەرىلۋدە. قالاداعى بالالاردىڭ قاۋىپسىزدىگىن قامتاماسىز ەتۋ باعىتىنداعى بۇل جۇمىس الداعى ۋاقىتتا دا ەرەكشە باقىلاۋدا بولىپ، جۇيەلى تۇردە جالعاسادى.
جاڭا وقۋ جىلى قارساڭىنداعى مۇنداي كەشەندى تەكسەرۋلەردىڭ باستى ماقساتى – ءاربىر بالانىڭ مەكتەپتە ءوزىن ءقاۋىپسىز سەزىنۋىنە جاعداي جاساۋ. ويتكەنى ساپالى ءبىلىم بەرۋدىڭ دە، بالانىڭ جان-جاقتى دامۋىنىڭ دا ەڭ باستى العىشارتى – ءقاۋىپسىز ورتا.
