ق ر وقۋ-اعارتۋ مينيسترلىگى ۇلتتىق رەسۋرستاردان تۇسەتىن تابىس بولاشاق ۇرپاقتى قولداۋعا باعىتتالاتىن حابارلادى.
«ۇلتتىق قور – بالالارعا» باستاماسى قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆتىڭ قازاقستان حالقىنا 2022 جىلعى 1 قىركۇيەكتەگى جولداۋىندا جاريالاندى. باستامانىڭ نەگىزىندە ۇلتتىق بايلىق ءاربىر ازاماتقا بالا كەزىنەن باستاپ ناقتى ءارى تىكەلەي پايدا اكەلۋى قاجەت، ال تابيعي رەسۋرستاردى پايدالانۋدان تۇسەتىن تابىس نىسانالى تۇردە جانە تەڭ دارەجەدە ءبولىنۋى ءتيىس دەگەن قاعيدات جاتىر.
باستامانى ىسكە اسىرۋ 2024 جىلعى 1 قاڭتاردان باستالدى. باعدارلاماعا 2006 جىلدان باستاپ تۋعان قازاقستان رەسپۋبليكاسى ازاماتتارىنىڭ بارلىق بالالارى قاتىسادى. باعدارلاما ىسكە قوسىلعان كەزەڭدە 6 919 131 بالانى قامتيدى. 2024 جىلى 304 815 قاتىسۋشى جيناقتالعان قاراجاتتى پايدالانۋ قۇقىعىنا يە بولاتىن جاسقا جەتتى. قاراجاتتى ەسەپتەۋ بارلىق قاتىسۋشىلار ءۇشىن تەڭ شارتتار اياسىندا جۇزەگە اسىرىلادى جانە تۇرعىلىقتى وڭىرىنە، وتباسىنىڭ تابىس دەڭگەيىنە نەمەسە اتا-اناسىنىڭ الەۋمەتتىك مارتەبەسىنە بايلانىستى ەمەس.
قارجىلىق تەتىك قازاقستان رەسپۋبليكاسى ۇلتتىق قورىنىڭ ينۆەستيسيالىق كىرىسىنىڭ 50 پايىزىن جىل سايىن بالالاردىڭ ارنايى ماقساتتى جيناقتاۋ شوتتارىنا باعىتتاۋدى كوزدەيدى. قاراجات ءبىرىڭعاي جيناقتاۋشى زەينەتاقى قورىنداعى جەكە شوتتاردا جيناقتالىپ، پايدالانۋعا دەيىن ينۆەستيسيالانادى. باعدارلاما قاراجاتىن ازامات 18 جاسقا تولعانعا دەيىن الۋ مۇمكىن ەمەس. ەسەپتەۋلەردىڭ كوزى مۇنايدان، گازدان جانە ەلدىڭ وزگە دە ستراتەگيالىق رەسۋرستارىنان تۇسەتىن تۇسىمدەر ەسەبىنەن قالىپتاستىرىلاتىن ينۆەستيسيالىق تابىس بولىپ تابىلادى.
2024 جىلى ءاربىر بالاعا 100،52 اقش دوللارى ەسەپتەلدى. 2025 جىلى ەسەپتەلگەن سوما 129،38 اقش دوللارىن قۇرادى.
ماقساتتى جيناقتاردى پايدالانۋ كامەلەت جاسىنا تولعاننان كەيىن ەكى باعىت بويىنشا جۇزەگە اسىرىلادى. قاراجات تۇرعىن ءۇي جاعدايلارىن جاقسارتۋعا نەمەسە قازاقستانداعى جانە شەتەلدەگى ءبىلىم بەرۋ ۇيىمدارىندا وقۋ اقىسىن تولەۋگە باعىتتالۋى مۇمكىن. قاراجاتتى تولىق كولەمدە دە، ءىشىنارا دا پايدالانۋعا جول بەرىلەدى. پايدالانىلماعان قالدىق ماقساتتى جيناقتاۋ شوتىندا ساقتالادى.
قاراجاتتى الۋ ءراسىمى ۋاكىلەتتى وپەراتورلار ارقىلى جۇرگىزىلەدى. قاراجات وپەراتورعا اۋدارىلىپ، ودان ءارى قاتاڭ تۇردە مالىمدەنگەن ماقساتىنا سايكەس قاراجاتتى الۋشىنىڭ بانك شوتىنا اۋدارىلادى. ماقساتتى راستاماي تىكەلەي قاراجات الۋ كوزدەلمەگەن.
2026 جىلعى 1 قاڭتارداعى جاعداي بويىنشا ماقساتتى جيناقتاردى پايدالانۋ تۋرالى 205 505 ءوتىنىش ورىندالدى. اۋدارىلعان قاراجاتتىڭ جالپى كولەمى 31،61 ملن اقش دوللارىنان استى. ونىڭ ىشىندە 127 445 ءوتىنىش بويىنشا 19،69 ملن اقش دوللارى تۇرعىن ءۇي جاعدايلارىن جاقسارتۋعا، 78 060 ءوتىنىش بويىنشا 11،92 ملن اقش دوللارى ءبىلىم الۋ اقىسىن تولەۋگە باعىتتالدى.
2026 جىلعى قاڭتار ايىنداعى جاعداي بويىنشا 6 918 656 قازاقستاندىق بالاعا كەزەكتى ەسەپتەۋ جۇرگىزىلدى. ءبىر بالاعا 130،71 اقش دوللارى مولشەرىندە تيەسىلى. ناتيجەسىندە باعدارلاماعا ءۇشىنشى جىل قاتارىنان قاتىسىپ وتىرعان بالاعا ەسەپتەلگەن قاراجاتتىڭ جالپى سوماسى ينۆەستيسيالىق كىرىستى قوسا العاندا 370 دوللار 56 سەنتتى قۇرادى. 2026 جىلى 356 613 قازاقستان ازاماتى 18 جاسقا تولىپ، ءوز ماقساتتى جيناقتارىن پايدالانۋ قۇقىعىنا يە بولادى.
ەسەپتەلگەن قاراجات تۋرالى اقپارات اتا-انالار ءۇشىن egov.kz پورتالى جانە kids.enpf.kz سايتى ارقىلى سيفرلىق فورماتتا قولجەتىمدى. 18 جاسقا تولعان ازاماتتار ءبىرىڭعاي جيناقتاۋشى زەينەتاقى قورى مەن ەلەكتروندىق ۇكىمەتتىڭ سەرۆيستەرى ارقىلى ءوز دەرەكتەرىنە دەربەس قول جەتكىزە الادى.
