الماتىداعى قازاق ۇلتتىق قىزدار پەداگوگيكالىق ۋنيۆەرسيتەتىندە ستۋدەنتتىك ءوزىن-وزى باسقارۋ مەن جاستاردىڭ اشىق پىكىر الماسۋىنا ارنالعان ستۋدەنتتىك قۇرىلتاي قۇرىلدى، - دەپ حابارلايدى alnews.
ونىڭ قۇرامىنا 40-تان استام ستۋدەنت كىردى. العاشقى وتىرىستا قاتىسۋشىلارعا قۇرىلتايدىڭ تۇجىرىمداماسى مەن ءتوراعالىققا ۇسىنىلعان كانديداتتار تانىستىرىلىپ، كەيىن ءتوراعا سايلاۋى ءوتتى.
ءىس-شاراعا ۋنيۆەرسيتەت باسشىلىعى، الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك، جاستار ۇيىمدارىنىڭ وكىلدەرى مەن ستۋدەنتتىك بەلسەندىلەر قاتىستى.
ستۋدەنتتىك قۇرىلتاي ستۋدەنتتەردى تولعاندىراتىن ماسەلەلەردى كوتەرىپ، ۇسىنىسى مەن باستاماسىن ورتاعا سالۋعا، ولاردى جۇزەگە اسىرۋعا اتسالىسۋعا جانە ۋنيۆەرسيتەت پەن قالا قۇرىلىمدارىمەن اشىق پىكىر الماسۋعا جول اشادى.
الماتى قالاسى جاستار ساياساتى باسقارماسىنىڭ باسشىسى ازيز كاجدەنبەكتىڭ ايتۋىنشا، ستۋدەنتتىك ءوزىن-وزى باسقارۋدى دامىتۋ جاستارعا ءوزىن تولعاندىراتىن تۇيتكىلدەردى كوتەرىپ قانا قويماي، ولاردىڭ شەشىمىن تابۋعا تىكەلەي اتسالىسۋعا مۇمكىندىك بەرەدى.
«بۇگىندە جاستار ستۋدەنتتىك ومىرگە قاتىستى شەشىمدەرگە سىرتتاي باقىلاۋشى بولىپ قالماي، بەلسەندى ارالاسۋى ماڭىزدى. ستۋدەنتتىك قۇرىلتاي – وزەكتى ماسەلەلەردى اشىق ايتىپ، باستاما كوتەرۋگە، جاۋاپكەرشىلىكتى مويىنعا الىپ، ورتاق شەشىم ىزدەۋگە مۇمكىندىك بەرەتىن ورتا. وسىنداي تەتىكتەر ارقىلى الماتى مەن ەلىمىزدىڭ دامۋىنا ۇلەس قوسۋعا دايىن، بەلسەندى ءارى جاۋاپتى ازاماتتاردىڭ جاڭا بۋىنى قالىپتاسادى»، – دەدى ازيز كاجدەنبەك.
ۋنيۆەرسيتەت رەكتورى بەيبىتگۇل كارىموۆانىڭ ايتۋىنشا، ستۋدەنتتەردىڭ قۇقىقتىق ساۋاتىن ارتتىرۋ، اكادەميالىق ادالدىق قاعيدالارىن ساقتاۋ، ەكولوگيالىق مادەنيەتتى قالىپتاستىرۋ جانە قوعامعا پايدا كەلتىرۋگە ۇمتىلۋ – جاستارمەن جۇرگىزىلەتىن تاربيە جۇمىسىنىڭ نەگىزگى باعىتتارىنىڭ ءبىرى.
«ساپالى ءبىلىم، دەنساۋلىق پەن ءال-اۋقات، گەندەرلىك تەڭدىك، ەكولوگيالىق مادەنيەت جانە الەۋمەتتىك جاۋاپكەرشىلىك ستۋدەنتتەردىڭ كۇندەلىكتى ومىرىمەن ۇشتاسىپ، جاستاردىڭ قوعامنىڭ تۇراقتى دامۋىنا قاتىسۋىنا مۇمكىندىك بەرەدى. بۇگىنگى ستۋدەنت – بولاشاق مامان عانا ەمەس، ەلدىڭ قوعامدىق دامۋىنا ۇلەس قوسا الاتىن ازامات. ءبىز ستۋدەنتتىك قۇرىلتايدى جاستاردىڭ ءۇنىن ەستۋگە، وزەكتى ماسەلەلەردى اشىق تالقىلاۋعا جانە ستۋدەنتتەردىڭ باستامالارىن قولداۋعا مۇمكىندىك بەرەتىن ماڭىزدى ديالوگ الاڭى رەتىندە قاراستىرامىز»، – دەدى بەيبىتگۇل كارىموۆا.
ءىس-شارا بارىسىندا الماتىداعى قۇرىلتاي سايلاۋىن ۇيىمداستىرۋعا اتسالىسقان بەلسەندى جاستار دا ماراپاتتالدى. جاستار ۇيىمدارى، قوعامدىق بىرلەستىكتەر، جوعارى وقۋ ورىندارى مەن كوميۋنيتي ورتالىقتاردىڭ وكىلدەرىنە قالا اكىمىنىڭ العىس حاتى تابىستالدى.
ستۋدەنتتىك قۇرىلتاي جاستاردى ورتاق ماقسات پەن باستامالار توڭىرەگىندە بىرىكتىرىپ، ولاردىڭ كوشباسشىلىق قابىلەتىن شىڭداۋىنا جانە شاھاردىڭ قوعامدىق ومىرىنە بەلسەندى ارالاسۋىنا جول اشاتىن تۇراقتى ۇيىمعا اينالماق.
