جاڭا كونستيتۋسيا جوباسىنداعى سيفرلىق ورتانى رەتتەۋگە قاتىستى ۇسىنىستار الماتى وبلىسىنىڭ تۇرعىندارى ءۇشىن ايرىقشا ماڭىزدى. بۇل تۋرالى وبلىس ءماسليحاتىنىڭ ءتوراعاسى قۋات بايعوجايەۆ كونستيتۋسيالىق كوميسسيانىڭ 11ء-شى وتىرىسىندا مالىمدەدى.
ونىڭ ايتۋىنشا، الماتى وبلىسى – حالىق تىعىز قونىستانعان، سيفرلىق سەرۆيستەر بەلسەندى ىسكە قوسىلعان وڭىرلەردىڭ ءبىرى. سوندىقتان، ۇلتتىق ەكونوميكانىڭ ءوسۋ درايۆەرىنە اينالۋى ءتيىس «Alatau City» جوباسى ءدال وسى وڭىردە قولعا الىنىپ جاتىر.
«بۇگىندە ازاماتتاردىڭ قاۋىپسىزدىگى ماسەلەسى قالىپتاسقان ۇعىمدار شەڭبەرىنەن شىعىپ، سيفرلىق تەحنولوگيالار دەڭگەيىنە دەيىن كوتەرىلگەنىن كورىپ وتىرمىز. سيفرلىق تەحنولوگيا قوعامنىڭ بارلىق سالاسىنا ارالاسىپ، كۇندەلىكتى ادام ءومىرىنىڭ اجىراماس بولىگىنە اينالدى. ال جاڭا كونستيتۋسيا جوباسىندا ازاماتتاردىڭ سيفرلىق سالاداعى قۇقىعىن قورعاۋ مىندەتى قاراستىرىلعانى – بۇگىنگى كۇن تالابى ەكەنى داۋسىز»، – دەدى قۋات بايعوجايەۆ.
ءوز سوزىندە سپيكەر ازاماتتاردىڭ ءوزارا حات-حابار الماسۋ قاۋىپسىزدىگى، ەلەكتروندى كوممۋنيكاسيا، دەربەس دەرەكتەردىڭ قورعالۋى سىندى ماسەلەلەردىڭ قامتىلۋى جەكە ءومىر قۇپياسىنىڭ كەپىلدىگىن نىعايتىپ، سيفرلىق سەرۆيستەرگە دەگەن سەنىمدى كۇشەيتەتىنىن جەتكىزدى.
«ولاردىڭ كونستيتۋسيالىق دەڭگەيدە بەكىتىلۋى سيفرلىق قاۋىپسىزدىك سالاسىنداعى زاڭنامانى ءارى قاراي دامىتۋ تاجىريبەسىنە بەرىك نەگىز بولا الادى. ۇسىنىلىپ وتىرعان وزگەرىستەر ازاماتتار ءۇشىن ناقتى ماسەلەلەردەن كورىنىس تابۋى قاراپايىم ازاماتتاردىڭ كۇندەلىكتى ومىردە الاڭسىز بولىپ، قوعامنىڭ مەملەكەتتىك ينستيتۋتتارعا دەگەن سەنىمىنىڭ كۇشەيتۋگە اسەر ەتەدى»، – دەدى ول.
ءسوز سوڭىندا كوميسسيا مۇشەسى كونستيتۋسيا جوباسى جەتكىلىكتى پىسىقتالعانىن جانە ونى بۇكىلحالىقتىق رەفەرەندۋمعا شىعارۋعا بولاتىنىن ايتتى.
