3-4 شىلدە كۇندەرى شانحاي ىنتىماقتاستىق ۇيىمىنا مۇشە ەلدەردىڭ باسشىلارى استانادا باس قوسادى. بۇل شىۇ باسشىلار كەڭەسىنىڭ 24ء-شى جينالىسى. ۇيىم سوڭعى 10 جىلدىقتا قارقىندى دامىدى جانە ىقپالدى جاڭا مۇشەلەرمەن تولىقتى.
الەمنىڭ جارتىسىنان كوپ حالقىن قامتىعان جانە 4 بىردەي يادرولىق دەرجاۆا مۇشە بولىپ وتىرعان ۇيىمنىڭ ءار ءىس-قيمىلدارى سىرت تاراپتىڭ ۇدايى نارازىندا. سوندىقتان كەزەكتى سامميتتە قانداي ماسەلەلەر ورتاعا سالىنىپ، قانداي جاڭا باستامالار كوتەرىلمەك؟ وسى جانە وزگە سۇراقتار وسى اپتاداعى ءبىرشاما وزەكتى تاقىرىپ بولماق.
استانا ءسامميتى قازاقستاننىڭ ۇيىمداعى ءتوراعالىعىن قورىتىندىلايدى. كەلەسى ءتوراعالىقتى جۇڭگو قابىلداپ الادى. ءارى بۇل رەت بەلارۋس ۇيىمنىڭ رەسمي مۇشەسى رەتىندە قابىلدانباق. بۇعان دەيىن بەلارۋس، موڭعوليا جانە اۋعانستان باقىلاۋشى ەلدەر قاتارىندا بولاتىن. وسىمەن قازاقستاننىڭ ءتوراعالىعى كەزىندە ۇيىمعا ەكى ەل – يران مەن بەلارۋس مۇشە بولعان بوادى.
ۇيىمعا مۇشەلەر سانىنىڭ كوبەيۋى ونداعى شاعىن ەلدەر ءۇشىن ءتيىمدى. سەبەبى، رەسەي مەن جۇڭگو سىندى ءىرى ەلدەر ۇيىمدى ءوزى قالاعان باعىتتا الىپ كەتپەس ءۇشىن ولارعا بالاما كۇش رەتىندە ءۇندىستان، پاكىستان جانە يران سەكىلدى ءوز ۇپايىن تۇگەندەپ وتىراتىن ەلدەر كەرەك.
سونىمەن بەرىگە قازاقستان پرەزيدەنتى قاسىم-جومارت توقايەۆ سينحۋا اگەنتتىگىنە بەرگەن سۇقباتىندا وسى جولعى باس قوسۋ كەزىندە الەم ەلدەرىنە قاراتا جاڭا ۇندەۋ جاسالاتىنىن جەتكىزگەن. ونىڭ نەگىزى اشىق ديالوگ قۇرۋ، ءادىل ساۋدا قارىم-قاتىناستارىن قالىپتاستىرۋ جانە قاۋىپسىزدىكتىڭ جاڭا پاراديگماسى بولاتىنى ايتىلعان سۇقپاتتا.
جيىننان ءار تاراپ نە كۇتەدى؟
ماسكەۋ تۇرعىسىنان: ماسكەۋ ءۇشىن كەز-كەلگەن حالىقارالىق الاڭ ۋكراينا ماسەلەسىنە قاتىستى ءوز كوزقاراسىن ۇگىتتەيتىن ورتا سانالادى. ءارى بۇل باتىس جاعىنان وقشاۋلانا تۇسكەن رەسەي ءۇشىن ءوزىنىڭ ءالى دە قارىم-قاتىناستىڭ كەڭ كەڭىستىگى بار ەكەنىن كورسەتۋگە تاپتىرماس وراي.
بەيجىڭ تۇرعىسىنان: بەيجىڭدى ايماقتاعى ءوزىنىڭ ەكونوميكالىق مۇددەلەرى الاڭداتادى. دەرجاۆالار اراسىنداعى باسەكە قىزا تۇسكەندىكتەن قىتايدىڭ ءۇندى جانە تىنىق مۇحيتى ايماعىنداعى قيمىل-قوزعالىستارى توسقاۋىلعا ۇشىرادى. ول ەندى ورتا ازيا جانە ورتا شىعىس، وڭتۇستىك ازياداعى "ءبىر بەلدەۋ، ءبىر جول" جوبالارىنىڭ اياقسىز قالماۋىن قالايدى. ال تەررورلىق توپتاردىڭ رەسەيدەگى ارەكەتتەرىنىڭ جيىلەۋى جانە اۋعانستان جاعدايى وسى مۇددەسىنە كەرى اسەر بەرە مە دەپ الاڭدايدى. سوندىقتان، ءوزىنىڭ تەرروريزم مەن ەكسترەميزمگە جانە سىرتقى كۇشتەرگە قارسى ءىس-قيمىلدارىن ۇيىم ىشىندە ورنىقتىرۋعا تىرىسادى.
ءۇندىستان مەن پاكىستان تۇرعىسىنان: جاڭا-دەلي دە، يسلاماباد دا شىۇ ىشىندە بەلسەندىلىگى تومەن. سەبەبى، ءوزارا قايشىلىعى بار ەلدەردىڭ ءبىر ۇيىمدا كەلىسىم تاۋىپ كەتۋى قيىن. دەگەنمەن، ورنىقتىلىق، قاۋىپسىزدىك جانە ساۋدا قاتىناستارىنىڭ تيىمدىلىگى تۇرعىسىنان شىۇ الاڭىن پايدالانۋدى كوزدەيدى.
يران تۇرعىسىنا: سانكسيالىق قىسىم جانە ساياسي وقشاۋلاۋدان زارداپ شەككەن تەھران (تەگەران) شىۇ ارقىلى يمپورت پەن ەكسپورتتىڭ مۇمكىندىگىن كەڭەيتۋدى قالايدى. وعان قوسا باتىس ەلدەرىنە قارسىلىعىن ۇيىم ىشىندەگى ىقپالدى رەسەي جانە جۇڭگو سىندى ەلدەرمەن ۇيلەستىرە تۇسكىسى كەلەدى.
ورتا ازيا ەلدەرى: ايماق ەلدەرى قاۋىپسىزدىك پەن تۇراقتىلىق تۇعىسىنان شىۇ-عا بەلگىلى دەڭگەيدە قىزىعۋشىلىق تانىتادى. بۇقعان قوسا ءىرى ەلدەرمەن ەكىجاقتى قارىم-قاتىناس كەزىندە شەشە المايتىن كەيبىر ماسەلەلەردى ۇيىم توڭىرەگىندە شەشۋگە كۇش سالادى.
شىۇ ءسامميتى 3-4 شىلدە كۇندەرى وتەدى، نەگىزگى وتىرىسى 4 شىلدە كۇنى ق ر پرەزيدەنتى توقايەۆتىڭ توراعالىمەن اشىلاتىن بولادى.
