«شىمبۇلاقتىڭ» كەلۋشىلەردى قابىلداۋ مۇمكىندىگى بەس ەسەگە ارتادى

الماتىدا تاۋ شاڭعىسى ينفراقۇرىلىمىن اۋقىمدى كەڭەيتۋ جوسپارلانعان. بۇل تۋرالى قالالىق تۋريزم باسقارماسىنىڭ وكىلدەرى حابارلادى.
 
جوبا اياسىندا «مەدەۋ» بازالىق ستانسياسى ارقىلى «شىمبۇلاق» پەن Oi-Qaragai كۋرورتتارىن بىرىكتىرەتىن ءبىرىڭعاي تاۋ كۋرورتتارى جۇيەسى قۇرىلماق.
 
جوبا شەڭبەرىندە 30 جاڭا اسپالى جول سالۋ، جالپى ۇزىندىعى 151 شاقىرىم بولاتىن تاۋ شاڭعىسى تراسسالارىن جاساۋ جانە قولدانىستاعى ينفراقۇرىلىمدى جاڭعىرتۋ كوزدەلگەن.
 
جوبا تولىق ىسكە اسقاننان كەيىن تاۋ شاڭعىسى جۇيەسىنىڭ تاۋلىكتىك قابىلداۋ مۇمكىندىگى بەس ەسەگە ارتىپ، 6 مىڭنان 30 مىڭ كەلۋشىگە دەيىن جەتەدى.
 
سونىمەن قاتار تۋريزم باسقارماسى 2029 جىلعا دەيىنگى الماتى تاۋ كلاستەرىن دامىتۋدىڭ كەشەندى جوسپارى ازىرلەنىپ جاتقانىن حابارلادى. قۇجات جەتى باعىت بويىنشا 73 ءىس-شارانى قامتيدى. وندا تاۋ ينفراقۇرىلىمىن دامىتۋ، تاۋ شاڭعىسى كۋرورتتارىنىڭ ءبىرىڭعاي جۇيەسىن قالىپتاستىرۋ، جاڭا اسپالى جولدار سالۋ جانە تۋريستىك مارشرۋتتاردى دامىتۋ قاراستىرىلعان.
 
جوبانى جۇزەگە اسىرۋ ناتيجەسىندە شەتەلدىك تۋريستەر سانى ەكى ەسەگە جۋىق ءوسىپ، 986 مىڭنان 1،7 ميلليون ادامعا جەتەدى دەپ كۇتىلۋدە. سونداي-اق. تۋريزم سالاسىندا جۇمىسپەن قامتىلعاندار سانى 101،8 مىڭ ادامعا دەيىن ارتادى.