الماتى قالاسى جاستار ساياساتى باسقارماسى مەن توتەنشە جاعدايلار دەپارتامەنتى بىرلەسە وتىرىپ، جاستار اراسىندا سەيسميكالىق قاۋىپسىزدىك مادەنيەتىن قالىپتاستىرۋعا باعىتتالعان كەشەندى اقپاراتتىق شارالاردى جۇيەلى تۇردە وتكىزىپ كەلەدى.
جاڭا وقۋ جىلى اياسىندا جوعارى وقۋ ورىندارىنىڭ ستۋدەنتتەرىنە جەر سىلكىنىسى، تابيعي اپاتتار مەن توتەنشە جاعدايلار كەزىندە ءوزىن-وزى ۇستاۋ ەرەجەلەرى جانە قاۋىپسىزدىك الگوريتمدەرى كەڭىنەن تۇسىندىرىلۋدە. سونىمەن قاتار، ءورت قاۋىپسىزدىگى، العاشقى مەديسينالىق كومەك كورسەتۋ، زارداپ شەككەندەرگە پسيحولوگيالىق قولداۋ كورسەتۋ سىندى ومىرلىك ماڭىزى بار تاقىرىپتار دا قامتىلۋدا.
شارانىڭ نەگىزگى ماقساتى — جاستاردىڭ داعدارىس ساتىندە سابىر ساقتاپ، دۇرىس شەشىم قابىلداۋىنا، ءتيىمدى ارەكەت ەتۋىنە ىقپال ەتۋ. الماتى سەيسميكالىق تۇرعىدان اسا كۇردەلى ايماق بولعاندىقتان، ءاربىر ازاماتتىڭ، اسىرەسە جاستاردىڭ، توتەنشە جاعدايدا ءوز ءومىرىن قورعاپ، وزگەلەرگە كومەك كورسەتە ءبىلۋى قوعام قاۋىپسىزدىگى ءۇشىن ەرەكشە ماڭىزدى.
شاراعا قاتىسقان ستۋدەنت ايجان بەكوۆا العان اسەرىمەن ءبولىستى:
«بۇگىنگى ءىس-شارا بارىسىندا مەن كوپتەگەن پايدالى اقپارات الدىم. ءاربىر ازامات توتەنشە جاعداي كەزىندە قالاي ارەكەت ەتۋ كەرەكتىگىن ءبىلۋى ءتيىس دەپ ويلايمىن. مۇنداي وقىتۋ جۇمىستارى تاعى ۇيىمداستىرىلسا، مىندەتتى تۇردە قاتىسار ەدىم»، – دەدى ول.
الداعى ۋاقىتتا مۇنداي اقپاراتتىق باعدارلامالار تەك جوعارى وقۋ ورىندارىندا عانا ەمەس، قالانىڭ بارلىق كوميۋنيتي ورتالىقتارىندا دا وتكىزىلەتىن بولادى. جاستار ءۇشىن ينتەراكتيۆتى كەزدەسۋلەر، سيمۋلياسيالىق جاتتىعۋلار مەن پراكتيكالىق ساباقتار ۇيىمداستىرىلىپ، ولاردىڭ قاۋىپسىزدىك داعدىلارىن جەتىلدىرۋگە مۇمكىندىك جاسالادى.
اقپاراتتىق-اعارتۋ جۇمىستارى — توتەنشە جاعدايلاردىڭ الدىن الۋدىڭ ەڭ ءتيىمدى جولدارىنىڭ ءبىرى. قاۋىپ-قاتەر تۋىنداعان ساتتە عانا ەمەس، وعان الدىن الا دايىن بولۋ — زاماناۋي قوعامنىڭ باستى قاعيداسى. وسى ورايدا جاستار ساياساتى باسقارماسى مەن توتەنشە جاعدايلار دەپارتامەنتىنىڭ بىرلەسكەن باستاماسى جاستاردىڭ قاۋىپسىزدىك سالاسىنداعى ءبىلىمىن ارتتىرۋعا جانە جاۋاپكەرشىلىگىن نىعايتۋعا جۇيەلى تۇردە ىقپال ەتۋدە.
