الماتىنىڭ رەسپۋبليكا الاڭىنداعى تاۋەلسىزدىك مونۋمەنتىنە قاراما-قارسى، ساتبايەۆ كوشەسىنىڭ بويىندا ورنالاسقان «الماتى قالاسىنىڭ اكىمدىگى» جاڭا ايالداما پۋنكتى پايدالانۋعا بەرىلدى. بۇل تۋرالى قالالىق جول قوزعالىسىن ۇيىمداستىرۋ جانە جولاۋشىلار تاسىمالى باسقارماسىنىڭ وكىلدەرى حابارلادى.
ايالداما زاماناۋي پاۆيلونمەن، جولاۋشىلارعا ارنالعان كۇتۋ ورىندارىمەن جانە اقپاراتتىق تاقتالارمەن جابدىقتالعان. ونى ورنالاستىرۋ كەزىندە جولاۋشىلاردىڭ قاۋىپسىزدىگىنە، جايلىلىعىنا جانە اۆتوبۋسقا ءمىنۋ مەن ءتۇسۋ قولايلىلىعىنا ەرەكشە نازار اۋدارىلدى.
بۇل ايالداماعا ەكى باعىت بويىنشا №21، №45، №95 جانە №121 اۆتوبۋس باعىتتارى قىزمەت كورسەتەدى. اتالعان باعىتتارعا كۇن سايىن 75 اۆتوبۋس شىعىپ، قالانىڭ ەڭ سۇرانىسقا يە اۋداندارىنىڭ بىرىنە تۇراقتى قاتىناستى قامتاماسىز ەتەدى.
جاڭا ايالدامانىڭ ىسكە قوسىلۋى قوعامدىق كولىك قىزمەتىنىڭ ساپاسىن ارتتىرۋعا، مەملەكەتتىك جانە قوعامدىق نىسانداردىڭ قولجەتىمدىلىگىن جاقسارتۋعا، سونداي-اق الماتىنىڭ ورتالىق بولىگىندەگى جولاۋشىلار ءۇشىن قولايلى جاعداي جاساۋعا مۇمكىندىك بەرەدى.
