قحپ ورتالىق كەڭسەسىندە جاڭا كونستيتۋسيا جوباسى بويىنشا پىكىرتالاس ءوتتى. وعان پارتيا بەلسەندىلەرى قاتىستى، - دەپ حابارلايدى alnews.
ءىس-شارا پارتيا مەكتەبىنىڭ كوپشىلىك الدىندا پىكىرتالاستىرۋ داعدىسىن جەتىلدىرۋ الاڭىندا ۇيىمداستىرىلدى. مۇندا پارتيا مۇشەلەرى فاكتىمەن جۇمىس ىستەۋ، دالەلمەن سويلەۋ، باياندامانىڭ ستراتەگياسى مەن ريتوريكاسىن قالىپتاستىرۋ، ءسوز سويلەۋ لوگيكاسىن باقىلاۋ جانە بەلگىلەنگەن ۋاقىت رەگلامەنتىن ساقتاۋ ماشىعىن مەڭگەرەدى. قاتىسۋشىلاردىڭ جاسىنا شەك قويىلمايدى، ولاردىڭ ماماندىعى مەن قىزمەت كورسەتۋ سالاسى ءارتۇرلى بولادى.
جوبا ەلىمىزدىڭ بارلىق وڭىرىندە قحپ فيليالدارىنىڭ بازاسىندا جۇزەگە اسىرىلۋدا. قحپ ورتالىق كەڭسەسىندە وتكەن پىكىرتالاس وسىعان ۇقساس پىكىرتالاس سەرياسىنىڭ ءبىرى بولدى.
– وكىنىشكە قاراي، كەيدە بەلگىلى ءبىر سالانىڭ بەيىندى ماماندارى ءتيىستى ءبىلىم مەن داعدىنىڭ يەسى بولا تۇرا باستامالارىن ناقتى تۇجىرىمداپ، ۇستانىمدارىن دالەلدى تۇردە قورعاي الماي جاتادى، – دەدى ءىس-شارانى ۇيىمداستىرۋشىلاردىڭ ءبىرى، ءماجىلىس دەپۋتاتى، قحپ «JAS ORTA» جاستار قاناتىنىڭ باسشىسى يسلام سۇڭقار. – ءبىراق ولارعا ادامداردىڭ، قحپ-نىڭ، سالانىڭ، بيزنەستىڭ مۇددەسىن جانە ت.ب. قورعاۋ قاجەت. ءبىز پولەميكالىق شەبەرلىكتى شىڭداۋ ءۇشىن وسىنداي الاڭ قۇردىق.
پىكىرسايىستىڭ شارتى بويىنشا ءسوز سويلەۋگە الدىن الا دايىندالمايدى. سپيكەرلەر باياندامالارىنىڭ تاقىرىبى مەن قورعاۋعا ءتيىس ۇستانىمىن سول جەردە بىلەدى. ءوز كەزەگىندە قازىلار القاسىنىڭ مۇشەلەرى ءسوز سويلەۋ بارىسىندا بايانداماشى قانشالىقتى سەنىمدى سويلەپ، تىڭداۋشىلاردى دالەلى مەن دايەگىنە يلاندىرا العانىنا باعا بەرەدى.
پىكىرتالاس بارىسىندا قوعامداعى ەڭ وزەكتى ماسەلەلەر تالقىلانادى. وسى جولى ق ر جاڭا كونستيتۋسياسىنىڭ جوباسى اياسىندا «كونستيتۋسيانىڭ پرەامبۋلاسى – بولاشاقتىڭ كومپاسى» جانە «ادامعا باعدارلانعان مەملەكەت» دەگەن تاقىرىپ تاڭدالدى. پىكىرتالاسقا قاتىسۋشى، قحپ بەلسەندىسى، جوبالاۋ كومپانياسىنىڭ باسشىسى نايليا اپپاسوۆا ءبىر پالاتالى پارلامەنت قۇرۋ باستاماسىنا قولداۋ بىلدىرە وتىرىپ، بۇل ماسەلە وسىعان دەيىن جۇزەگە اسىرىلعان رەفورمالار تىزبەگىنىڭ زاڭدى جالعاسى ەكەنىن اتاپ ءوتتى.
– ساياسي جۇيە رەفورمالانىپ، ترانسفورماسيا ءجۇرىپ جاتىر، – دەدى ن.اپپاسوۆا. – بۇل ءبىر پالاتالى پارلامەنتكە ءوز ءىسىنىڭ كاسىبي جانە تاجىريبەلى ماماندارىن بىرىكتىرىپ، ولارعا شەشىم قابىلداۋ جاۋاپكەرشىلىگىن جۇكتەيدى
قاتىسۋشىلاردىڭ ءبىرى، ساياساتتانۋشى، «ەۋرازيالىق مونيتورينگ» اناليتيكالىق زەرتتەۋ ورتالىعىنىڭ ديرەكتورى الىبەك تاجىبايەۆ «كۇشتى تۇلعالاردىڭ ورنىنا كۇشتى ينستيتۋتتار» دەگەن تاقىرىپتا بايانداما جاساپ، قازىرگى كونستيتۋسيالىق رەفورما باسقارۋ جۇيەسىن كۇشەيتۋدى كوزدەيتىنىن دالەلدەدى.
– بۇل ءۇشىن جاڭا كونستيتۋسيادا بارلىق جاعداي جاسالعان، – دەدى ساياساتتانۋشى.
قازاقستان حالىق پارتياسى بۇل جۇمىستى ودان ءارى جالعاستىرادى.
