قۇلسارىداعى «بولاشاق» جاڭا شاعىناۋدانىنداعى 100 ءۇيدىڭ بارلىعى «قازاقتەلەكومنىڭ» جوعارى جىلدامدىقتى ينتەرنەتىنە قوسىلۋعا مۇمكىندىك الدى، - دەپ حابارلايدى alnews.
بۇل ۇيلەر 2024 جىلعى سۋ تاسقىنىنان زارداپ شەككەن وتباسىلار ءۇشىن سالىنعان. كومپانيا مۇندا GPON تەحنولوگياسى بويىنشا وپتيكالىق جەلى تارتىپ، تۇرعىندار قونىستانعانعا دەيىن ءار ءۇيدى ينتەرنەتكە قوسۋعا قاجەتتى ينفراقۇرىلىمدى دايىندادى.
2024 جىلدىڭ كوكتەمىندە قۇلسارى اتىراۋ وبلىسىندا سۋ تاسقىنىنان ەڭ كوپ زارداپ شەككەن قالالاردىڭ ءبىرى بولدى. كوپتەگەن وتباسى باسپاناسىنان ايىرىلدى. سول تۇرعىندار ءۇشىن قالادا 100 ۇيدەن تۇراتىن جاڭا «بولاشاق» شاعىناۋدانى سالىندى.
جاڭا ۇيلەرمەن بىرگە مۇندا زاماناۋي بايلانىس جەلىسى دە جۇرگىزىلدى. «قازاقتەلەكوم» GPON تەحنولوگياسى بويىنشا وپتيكالىق جەلى تارتىپ، شاعىناۋدانداعى ءار ۇيگە جوعارى جىلدامدىقتى ينتەرنەت قوسۋعا مۇمكىندىك جاسادى.
جاڭا جەرگە كوشكەن تۇرعىندارعا ەندى ينتەرنەت جەلىسىنىڭ تارتىلۋىن كۇتىپ وتىرۋدىڭ قاجەتى جوق. ولار كوشىپ كەلگەن كۇننەن باستاپ ينتەرنەتتى جۇمىسقا، وقۋعا، جاقىندارىمەن بايلانىسۋعا جانە كۇندەلىكتى قاجەتىنە پايدالانا الادى. اسىرەسە جاڭا وقۋ جىلى باستالعان كەزدە بالالارى بار وتباسىلار ءۇشىن ينتەرنەتتىڭ قولجەتىمدى بولۋى ماڭىزدى.
شاعىناۋداندا GPON تەحنولوگياسى قولدانىلادى. بۇل تەحنولوگيادا وپتيكالىق تالشىق تىكەلەي ۇيگە دەيىن جەتكىزىلەدى. سونىڭ ارقاسىندا بىرنەشە قۇرىلعى ءبىر ۋاقىتتا ينتەرنەتكە قوسىلسا دا، بايلانىس جىلدام ءارى تۇراقتى جۇمىس ىستەيدى.
«ءبىز ءۇشىن جاڭا ۇيلەرگە كوشىپ جاتقان وتباسىلاردىڭ بايلانىس قىزمەتتەرىن بىردەن پايدالانا الۋى ماڭىزدى بولدى. سوندىقتان “بولاشاقتاعى” تەلەكوممۋنيكاسيالىق ينفراقۇرىلىمدى تۇرعىندار قونىستانعانعا دەيىن دايىندادىق. وپتيكالىق جەلى شاعىناۋدانداعى 100 ءۇيدىڭ بارلىعىن قامتيدى. تۇرعىندار جاڭا ۇيگە كوشكەن العاشقى كۇننەن باستاپ ينتەرنەتتى جۇمىسقا، وقۋعا، جاقىندارىمەن بايلانىسۋعا جانە كۇندەلىكتى شارۋالارىن شەشۋگە پايدالانا الادى»، – دەدى «قازاقتەلەكوم» اق بولشەك بيزنەس ديۆيزيونى باتىس ءوڭىرىنىڭ كوممەرسيالىق قىزمەت جونىندەگى وڭىرلىك ديرەكتورى تاڭشولپان قۇرمانعازييەۆا.
«بولاشاق» شاعىناۋدانىن ينتەرنەتپەن قامتۋ – «قازاقتەلەكومنىڭ» اتىراۋ وبلىسىنداعى وپتيكالىق جەلىنى دامىتۋ جۇمىستارىنىڭ ءبىر بولىگى. 2026 جىلدىڭ باسىنان بەرى وڭىردەگى 40 كوپقاباتتى ۇيدە جوعارى جىلدامدىقتى ينتەرنەتكە قوسىلۋ مۇمكىندىگى جاسالدى. بۇل ۇيلەردە بارلىعى 4 741 ءۇي شارۋاشىلىعى بار.
كومپانيا قولدانىستاعى تۇرعىن اۋدانداردا دا، جاڭادان سالىنىپ جاتقان نىسانداردا دا وپتيكالىق جەلىنى كەڭەيتۋدى جالعاستىرىپ كەلەدى. نەگىزگى ماقسات — جاڭا ۇيلەر پايدالانۋعا بەرىلگەن كەزدە تۇرعىنداردىڭ ينتەرنەتكە بىردەن قوسىلۋىنا مۇمكىندىك جاساۋ.
