«قازاقتەلەكوم» اق كورپوراتيۆتىك بيزنەس ديۆيزيونى جىل سايىنعى International Carrier Meeting 2026 كەزدەسۋىن وتكىزدى، - دەپ حابارلايدى alnews.
ءىس-شارا China Telecom، China Unicom، China Mobile، «مەگافون»، «روستەلەكوم»، Arelion Sweden، IBasis، PCCW Global، RETN جانە باسقا دا جەتەكشى شەتەلدىك بايلانىس وپەراتورلارى مەن سالانىڭ نەگىزگى سەرىكتەستەرى اراسىندا ديالوگ ورناتۋعا ارنالعان الاڭعا اينالعان.
ءىس-شارا اياسىندا جاھاندىق سيفرلىق ەكوجۇيەنى دامىتۋعا، حالىقارالىق بايلانىستى كەڭەيتۋگە جانە ەلدەر اراسىنداعى ىنتىماقتاستىقتى نىعايتۋعا ەلەۋلى ۇلەس قوسقان كومپانيالاردى ماراپاتتاۋ ءراسىمى ءوتتى.
ماراپات يەگەرلەرى قاتارىندا جۇڭگو، رەسەي، ورتالىق ازيا جانە ەۋروپا ەلدەرىنىڭ تەلەكوممۋنيكاسيا سالاسىنىڭ وكىلدەرى بار.
كەزدەسۋدى اشقان كورپوراتيۆتىك بيزنەس ديۆيزيونىنىڭ باس ديرەكتورى اسقار قايروۆ حالىقارالىق وپەراتورلارمەن تۇراقتى سەرىكتەستىك قاتىناستاردى دامىتۋدىڭ ماڭىزدىلىعىن اتاپ ءوتتى.
«بۇگىندە تەلەكوممۋنيكاسيا سالاسى ەرەكشە قارقىنمەن دامىپ كەلەدى جانە جەتىستىك كوپ جاعدايدا كومپانيالاردىڭ ساراپتامانى، تەحنولوگيالار مەن ينفراقۇرىلىمدىق مۇمكىندىكتەردى بىرىكتىرە الۋ قابىلەتىنە بايلانىستى. «قازاقتەلەكوم» ءۇشىن حالىقارالىق سەرىكتەستىكتى دامىتۋ – ستراتەگيالىق باسىمدىقتاردىڭ ءبىرى. ءبىز الەمنىڭ جەتەكشى وپەراتورلارىمەن ءوزارا ءىس-قيمىلدى جۇيەلى تۇردە كەڭەيتىپ، قازاقستاننىڭ ەۋرازيانىڭ سيفرلىق حابى رەتىندەگى ءرولىن كۇشەيتۋگە مۇمكىندىك بەرەتىن ينفراقۇرىلىمدى دامىتىپ كەلەمىز»، – دەپ اتاپ ءوتتى اسقار قايروۆ.
ءىس-شارا بارىسىندا «قازاقتەلەكوم» شەتەلدىك سەرىكتەستەرىنە سيفرلىق ينفراقۇرىلىم مەن دەرەكتەردىڭ حالىقارالىق ءترانزيتىن دامىتۋ باعىتىنداعى جۇمىستىڭ ناتيجەلەرىن تانىستىردى. قاتىسۋشىلار سالانىڭ وزەكتى ۇردىستەرىن، ءوزارا ءىس-قيمىلدى كەڭەيتۋ مۇمكىندىكتەرىن، جاڭا جوبالار مەن حالىقارالىق تەلەكوممۋنيكاسيالىق ينفراقۇرىلىمدى دامىتۋدىڭ باسىم باعىتتارىن تالقىلادى.
ەۋروپا مەن ازيا اراسىنداعى نەگىزگى ارنالاردىڭ قيىلىسىندا ورنالاسقان قازاقستاننىڭ بىرەگەي گەوگرافيالىق جاعدايى زاماناۋي ماگيسترالدىق ينفراقۇرىلىمنىڭ دامۋىمەن ۇشتاسا وتىرىپ، دەرەكتەردى بەرۋدىڭ ءتيىمدى ترانزيتتىك باعىتتارىن قالىپتاستىرۋعا جاعداي جاسايدى. كومپانيا حالىقارالىق ءوزارا ءىس-قيمىلدى جۇيەلى تۇردە كەڭەيتىپ، جەتەكشى شەتەلدىك بايلانىس وپەراتورلارىمەن جاڭا جەلىلىك تۇيىسۋلەر قۇرۋ بويىنشا جوبالاردى ىسكە اسىرۋدا. بۇل ينفراقۇرىلىمنىڭ وتكىزۋ قابىلەتىن ارتتىرۋعا، حالىقارالىق ارنالاردىڭ تۇراقتىلىعىن قامتاماسىز ەتۋگە جانە دەرەكتەردى بەرۋ كەزىندەگى كىدىرىستەردى ازايتۋعا مۇمكىندىك بەرەدى.
International Carrier Meeting 2026 تەلەكوممۋنيكاسيالىق كومپانيالار اراسىنداعى تىكەلەي ديالوگتىڭ ماڭىزدىلىعىن تاعى ءبىر مارتە كورسەتىپ، جاڭا بىرلەسكەن باستامالاردى تالقىلاۋعا ارنالعان الاڭعا اينالدى. حالىقارالىق بايلانىستاردى نىعايتۋ جانە ترانسشەكارالىق سيفرلىق ينفراقۇرىلىمدى دامىتۋ قازاقستاننىڭ ەۋرازياداعى نەگىزگى سيفرلىق جانە ترانزيتتىك ورتالىقتاردىڭ ءبىرى رەتىندەگى الەۋەتىن ودان ءارى ىلگەرىلەتۋگە ىقپال ەتەدى.
ال 2026 جىلعى 3–4 قىركۇيەكتە «قازاقتەلەكوم» اق الماتى قالاسىندا وتكەن جەتەكشى تەلەكوممۋنيكاسيالىق كومپانيالار، بايلانىس وپەراتورلارى، تەحنولوگيالىق سەرىكتەستەر مەن سيفرلىق نارىق قاتىسۋشىلارىنىڭ وكىلدەرىن بىرىكتىرگەن CIS GCCM 2026 VIII جىل سايىنعى كونفەرەنسياسىنا قاتىستى. تالقىلاۋلاردىڭ نەگىزگى تاقىرىپتارى سيفرلىق ينفراقۇرىلىمدى دامىتۋ، 5G تەحنولوگيالارىن ەنگىزۋ، جاساندى ينتەللەكتىنى قولدانۋ، كيبەرقاۋىپسىزدىك جانە جاڭا بايلانىس ارنالارىنىڭ دامۋىنا ارنالدى. كومپانيا وكىلدەرى حالىقارالىق وپەراتورلارمەن ءبىرقاتار ىسكەرلىك كەزدەسۋلەر وتكىزىپ، سەرىكتەستىك قاتىناستاردى كەڭەيتۋ جانە جاڭا مارشرۋتتاردى دامىتۋ پەرسپەكتيۆالارىن تالقىلادى.
وسى كەزدەسۋلەر اياسىندا «قازاقتەلەكوم» كومپانياسىنىڭ ازەربايجاندىق سەرىكتەسى AzerTelecom Int. بىرلەسىپ جۇزەگە اسىرىپ جاتقان ستراتەگيالىق جوبا – كاسپيي تەڭىزىنىڭ تۇبىمەن تالشىقتى-وپتيكالىق بايلانىس جەلىسىن (توبج) سالۋ جوباسى بويىنشا جاڭارتىلعان اقپارات ۇسىنىلدى.
«جوبانىڭ تەحنيكالىق بولىگى لوگيكالىق اياقتالۋ كەزەڭىنە جاقىندادى. اتاپ ايتقاندا، مارشرۋتتىڭ تەڭىز بولىگىن توسەۋ جۇمىستارى اياقتالدى، قازىرگى ۋاقىتتا كابەلدى جەرۇستى ينفراقۇرىلىمىمەن جالعاۋ جۇمىستارى جۇرگىزىلۋدە. مارشرۋتتى تولىق كوممەرسيالىق پايدالانۋعا 2027 جىلدان باستاپ بەرۋدى جوسپارلاپ وتىرمىز»، – دەپ اتاپ ءوتتى دكب حالىقارالىق كەلىسىمدەر دەپارتامەنتىنىڭ ديرەكتورى اينۇر بايباتىروۆا.
