Colisium جانە IMX Shanghai حالىقارالىق پلاتفورمالارى مۋزىكا يندۋسترياسى سالاسىنداعى ىنتىماقتاستىق تۋرالى مەموراندۋمعا قول قويدى، - دەپ حابارلايدى alnews.
كەلىسىم ازيا جانە تمد ەلدەرى اراسىنداعى كاسىبي بايلانىستى دامىتۋعا باعىتتالعان. بىرلەسكەن جوبالار تالقىلاناتىن الاڭداردىڭ ءبىرى الماتى بولماق. مۇندا 20-21 قاراشا كۇندەرى ماركوۆ كوشەسى، 44 مەكەنجايىنداعى Almaty Creative كەڭىستىگىندە Colisium Almaty كونفەرەنسياسى وتەدى. بۇل تۋرالى قالالىق تۋريزم باسقارماسىنىڭ وكىلدەرى ايتتى.
مەموراندۋمعا 29-31 قازان ارالىعىندا قىتايدا وتكەن IMX Shanghai مۋزىكالىق فورۋمى بارىسىندا قول قويىلدى. تاراپتار كونسەرت ۇيىمداستىرۋشىلارى، پروديۋسەرلەر، مۋزىكالىق لەيبلدەر مەن ارتيستەردىڭ مەنەدجەرلەرى اراسىنداعى ىنتىماقتاستىقتى دامىتۋدى كوزدەپ وتىر.
كونفەرەنسيادا جۇڭگو مۋزىكا نارىعىنىڭ قىر-سىرى، شەتەلدىك ورىنداۋشىلاردى جەرگىلىكتى اۋديتورياعا تانىتۋ جولدارى جانە گاسترولدىك كونسەرتتەردى ۇيىمداستىرۋ ءتارتىبى تالقىلانادى. جيىنعا جاپونيا، وڭتۇستىك كورەيا، ۇلىبريتانيا، اقش، رەسەي جانە وزبەكستاننان كەلگەن سالا ماماندارى دا قاتىسپاق.
باعدارلامادا مۋزىكانى حالىقارالىق پلاتفورمالار ارقىلى تاراتۋ، شەتەلدە كونسەرت وتكىزۋ، مۋزىكالىق لەيبلدەرمەن جۇمىس ىستەۋ جانە ارتيستەردىڭ حالىقارالىق فەستيۆالدەرگە قاتىسۋى سەكىلدى وزەكتى ماسەلەلەر قامتىلعان.
بۇل كەزدەسۋ قازاقستاندىق ورىنداۋشىلار مەن پروديۋسەرلەرگە شەتەلدىك مۋزىكا بيزنەسىنىڭ وكىلدەرىمەن تىكەلەي ىنتىماقتاستىق جايىن تالقىلاۋعا جول اشادى.
الماتىدا كرەاتيۆتى يندۋستريا سالاسىندا 21 مىڭنان استام سۋبەكت جۇمىس ىستەيدى. مۋزىكا سالاسى – وسى سەكتوردىڭ ماڭىزدى باعىتتارىنىڭ ءبىرى.
