بەيجىڭ، 2024 جىلعى 30 ناۋرىز – قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ قىتايعا رەسمي ساپارى اياسىندا ءىرى قىتايلىق كومپانيالاردىڭ باسشىلىعىمەن كەزدەسۋلەر وتكىزدى. كەزدەسۋ بارىسىندا قازاقستاندا بىرلەسكەن ينۆەستيسيالىق جوبالاردى ىسكە اسىرۋ جونىندەگى جوسپارلار تالقىلاندى.
قىتايلىق بيزنەسمەندەر قازاقستاندا جۇزەگە اسىرىلىپ جاتقان ەكونوميكالىق رەفورمالارمەن، ينۆەستيسيالىق ساياسات پەن پرەفەرەنسيالارمەن، سونداي-اق ەلىمىزدە بيزنەس جۇرگىزۋدىڭ ارتىقشىلىقتارىمەن تانىستى.
قىتايدىڭ «Shandong Hi-Speed Group» مەملەكەتتىك اشىق ينۆەستيسيالىق كومپانياسىنىڭ وكىلدەرىمەن كەزدەسۋ بارىسىندا قازاقستان-قىتاي قوس ساۋدا-ونەركاسىپ پاركىن سالۋ جوسپارلارى تالقىلاندى. قازاقستان تاراپى وسى باعىتتاعى ىنتىماقتاستىقتى ودان ءارى دامىتۋعا جانە جوبانى ىسكە اسىرۋعا جان-جاقتى قولعابىس كورسەتۋگە دايىن ەكەنىن ءبىلدىردى.
قحر-داعى ەت ءوندىرۋ جانە ديستريبۋسيالاۋ جونىندەگى 1300-گە جۋىق مۇشەدەن تۇراتىن ەڭ ءىرى ۇلتتىق قاۋىمداستىعى – «جۇڭگو ەت قاۋىمداستىعىنىڭ» باسشىلىعىمەن قازاقستاننان مال شارۋاشىلىعى ونىمدەرىن ەكسپورتتاۋ ماسەلەلەرى تالقىلاندى.
«East Hope Group» ديرەكتورلار كەڭەسىنىڭ ءتوراعاسى ليۋ يۋنسين كومپانيانىڭ قازاقستانداعى ءبىرقاتار جوبالاردى ىسكە اسىرۋ جوسپارلارىمەن تانىستىردى. بۇل قىتايلىق كومپانيا الەمدەگى ەڭ ءىرى ەلەكتروليتتىك اليۋمينيي جانە اليۋمينيي توتىعىن وندىرۋشىلەردىڭ وندىعىنا كىرەدى.
قىتايدىڭ ىسكەر توپ وكىلدەرى بىرلەسكەن پەرسپەكتيۆالىق جوبالاردى جۇزەگە اسىرۋعا ۇلكەن قىزىعۋشىلىق تانىتىپ، قازاقستاندىق سەرىكتەستەرمەن تابىستى ىنتىماقتاستىققا ءۇمىت ءبىلدىردى.
