قازاق تاتتىلەرى
ءتاتتى ىرىمشىك
قاراپايىم بولعانىمەن، ءدامدى دە پايدالى تاعام. ىرىمشىككە ءتۇرلى ءتاتتى قوسپالار ارالاستىرۋ ارقىلى ازىرلەنەدى. ەلىمىزدىڭ ءار بولىگىندە ءارقالاي: كەي جەرلەردە بال، تاعى ءبىر وڭىرلەردە قانت نەمەسە توساپ قوسىلادى. ءتاتتى ىرىمشىكتى توڭازىتقىشتا ساقتاۋ كەرەك، سەبەبى بۇل - جارامدىلىق مەرزىمى قىسقا تاعام.
بالقايماق
بالقايماقتى جاساۋ ءۇشىن الدىمەن شيكى قايماقتى اقىرىن وتقا قويىپ،باپپەن ماي شىققانعا دەيىن قايناتادى. قانت، بال، ۇن قوسىپ ارالاستىرىپ، تاعى 8-10 مينۋتقا تىندىرىپ قويادى. دايىن بولعان كەزدە باۋىرساقپەن قوسىپ شاي داستارحانىنا ۇسىنادى.
جەنت
جەنت – تالقاننان جاسالاتىن ۇلتتىق تاعام. تالقانعا (قۋىرىلعان بيداي نەمەسە ارپا ۇنتاعى) ءسۇت، ماي، قانت، بال جانە مەيىز قوسىلادى. دايىن قوسپانىڭ تولىق سۋىعانىن كۇتىپ، وتكىر پىشاقپەن قالاعان قالىپتا كەسەدى. ەرتەرەكتە مۇنداي ءتاتتى تاعام داۋلەتتى ادامداردىڭ داستارحانىنان عانا تابىلعان ەكەن.
تىسكەباسار تاعامدار
شي باۋىرساق
شي باۋىرساقتىڭ ۇيرەنشىكتى باۋىرساقتان كولەمى دە، ءدامى دە، قامىرى دا ايتارلىقتاي وزگەشە. ولار تۇزدالماعان قامىردان، سۋ قوسىلماي پىسىرىلەتىندىكتەن ۇزاق ۋاقىتقا ساقتالادى. سودان بولار، شي باۋىرساق جاۋگەرشىلىك زامانداردا كوشپەندىلەردىڭ ۇرىس-شايقاستارعا العان جەڭسىك اسىنا اينالعان. شي باۋىرساق – سەمەي ءوڭىرىنىڭ بەتكەۇستار ءدامى. ءتاتتى دە قىتىرلاق شي باۋىرساقتى مۇنداعى كەز كەلگەن دۇكەننەن جانە بازارداعى ناۋبايحانالاردان تابا الاسىز!
قۇرت
قۇرت – تۇزدالعان سۇزبەنى كەپتىرۋ جولىمەن ازىرلەنەتىن ءقىشقىلسۇتتى تاعام. ونىڭ كەپتىرىلگەن تۇزدى قۇرت، قايناتىلعان قۇرت، قاتىق سياقتى تۇرلەرى بار. الىپ جۇرۋگە قولايلىسى - كەپتىرىلگەن قۇرت. قۇرتتىڭ وزگە تۇرلەرىنە قاراعاندا ونىڭ ساقتالۋ مەرزىمى دە ۇزاعىراق. سونىمەن بىرگە، حالىق اراسىندا ءنارلى سورپاعا قۇرت قوسىپ ءىشۋ كەڭ تارالعان. قۇرت سورپاعا قىشقىلتىم ءدام بەرىپ، ەرەكشە تاتىمدى ەتەدى.
ءسۇر ەت
سۇرلەۋ – ەتتى وڭدەۋدىڭ العاشقى ءارى ەڭ ناتيجەلى ادىستەرىنىڭ ءبىرى. سۇرلەنگەن ەتتى ازداعان وڭدەۋدەن كەيىن تاعامعا تۇتىنا بەرۋگە بولادى. ال سۇرلەنگەن بالىق اسپازدىق وڭدەۋدى تىپتەن قاجەت ەتپەيدى.
ءسۇر ەت – جۇرەك جالعاپ الامىن دەۋشىلەر ءۇشىن كەرەمەت اس. ونىڭ قۇرامىنداعى پروتەيندەر مەن ميكروەلەمەنتتەر اعزانى جاقسى اۋقاتتاندىرادى. ال سۇرلەۋ ءادىسى ەتتىڭ جىلۋدىڭ اسەرىنەن بۇلىنبەي ساقتالۋىن قامتاماسىز ەتەدى.
جوعارىدا اتالعاندارمەن قوسا، مىندەتتى تۇردە تابا نان، سۇزبە، قازى، شەلپەك سياقتى ءتىل ۇيىرەر ۇلتتىق تاعامدارىمىزدان ءدام تاتىپ كورۋگە كەڭەس بەرەمىز!
اسىڭىز ءدامدى، ساياحاتىڭىز ءماندى بولسىن!
