الماتىدا قازاق سپورت جانە تۋريزم اكادەمياسىنىڭ جاڭا زاماناۋي كۇرەس سپورت كەشەنى اشىلدى. اكادەميانىڭ ءوز قاراجاتىنا سالىنعان بۇل نىسان وقۋ ورنىنىڭ سپورت ينفراقۇرىلىمىن ايتارلىقتاي كەڭەيتىپ، بولاشاق بالۋاندارىنىڭ كاسىبي دايىندىعىن كۇشەيتۋدى ماقسات ەتەدى.
جاڭا كەشەننىڭ جالپى اۋماعى – مىڭ شارشى مەتر. كەڭ ءارى جارىق زالدا ءتورت بوزكىلەم قاتار ورنالاسقان، قازاق كۇرەسى، ەركىن جانە گرەك-ريم كۇرەسى، دزيۋدو مەن سامبو سپورت تۇرلەرىن تولىققاندى دامىتۋعا قاجەتتى بارلىق جاعداي جاسالعان. ءبىر اۋىسىمدا 700-گە جۋىق سپورتشى جاتتىعا الادى. بۇعان دەيىن اكادەميادا ءبىر عانا بوزكىلەم ورنالاسقان شاعىن زال جۇمىس ىستەگەن ەدى.
اشىلۋ راسىمىنە ق ر عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى ءتوراعاسىنىڭ ورىنباسارى اقەركە ابىلايحان، وليمپيادا چەمپيونى يۋريي مەلنيچەنكو، پاريج وليمپياداسىنىڭ جۇلدەگەرى دەمەۋ جادىرايەۆ جانە پاراليمپيادا ويىندارىنىڭ جۇلدەگەرى زارينا رايفوۆا قاتىستى. شارا بارىسىندا سپورتشىلار جاس بالۋاندارعا شەبەرلىك ساعاتىن وتكىزىپ، تاجىريبەلەرىمەن ءبولىستى.
قازاق سپورت جانە تۋريزم اكادەمياسى — قازاق كۇرەس مەكتەبىنىڭ قالىپتاسۋىنا ۇلكەن ۇلەس قوسقان وقۋ ورنى. مۇندا ءار جىلدارى وليمپيادا جانە الەم چەمپيوندارى جاقسىلىق ۇشكەمپىروۆ، ءشامىل سەرىكوۆ، ۆالەريي رەزانسيەۆ، اناتوليي كولەسوۆ جانە يۋريي مەلنيچەنكو سەكىلدى تالاي تانىمال بالۋاندار تاربيەلەندى. ولاردىڭ جولىن بۇگىندە داۋلەت تۇرلىحانوۆ، اسحات جىتكەيەۆ، نۇرباقىت تەڭىزبايەۆ، عۇسمان قىرعىزبايەۆ، دەمەۋ جادىرايەۆ جانە پاراليمپيادا جۇلدەگەرى زارينا رايفوۆا جالعاستىرىپ كەلەدى.
اكادەميادا جاڭا كۇرەس بازاسىنىڭ اشىلۋى — وقۋ ورنىنىڭ سپورتتىق باعىتتاعى مۇمكىندىكتەرىن كەڭەيتىپ قانا قويماي، جاس سپورتشىلاردىڭ حالىقارالىق ارەنادا باسەكەگە قابىلەتتىلىگىن ارتتىرۋعا ىقپال ەتەتىن ماڭىزدى قادام رەتىندە باعالانىپ وتىر.
كۇرەس زالى اشىلعاننان كەيىن اكادەميانىڭ نەگىزگى عيماراتىندا ورتالىق ازيا ەلدەرىنىڭ ستۋدەنتتىك سپورت فەدەراسياسىنىڭ قۇرىلتاي كونفەرەنسياسى ءوتتى. جيىنعا ورتالىق ازيا مەملەكەتتەرى – قىرعىزستان، وزبەكستان، تاجىكستاننىڭ سپورت وكىلدەرى قاتىسىپ، تۇرىكمەنستان مەن موڭعوليانىڭ دەلەگاتتارى ونلاين فورماتتا قوسىلدى.
پلەنارلىق وتىرىس «ستۋدەنتتىك سپورتتىڭ وڭىرلىك ىنتىماقتاستىقتى دامىتۋ مەن جاستار الەۋەتىن نىعايتۋداعى ءرولى» تاقىرىبىندا ءوتتى. جيىندا ستۋدەنتتىك سپورتتى دامىتۋ، حالىقارالىق ارىپتەستىك ورناتۋ جانە ايماقتىق ىنتىماقتاستىقتى كۇشەيتۋگە قاتىستى ماڭىزدى ماسەلەلەر تالقىلاندى.
شارا قورىتىندىسىندا ورتالىق ازيا ستۋدەنتتىك سپورت فەدەراسياسىنىڭ قۇرىلتاي قۇجاتتارىنا قول قويىلدى. قايرات زاكيريانوۆ ورتالىق ازيا ستۋدەنتتىك سپورت فەدەراسياسىنىڭ پرەزيدەنتى بولىپ سايلاندى.
ستۋدەنتتىك سپورت — دەنساۋلىقتى نىعايتاتىن، تاربيە بەرەتىن ءارى كوشباسشىلىق قاسيەتتى قالىپتاستىراتىن ماڭىزدى باعىت. ستۋدەنتتىك سپورتتى دامىتۋ جاستاردىڭ سپورتقا قىزىعۋشىلىعىن ارتتىرىپ، ولاردىڭ الەۋەتىن كوتەرەدى. سونىمەن قاتار، حالىقارالىق ارىپتەستىكتى كۇشەيتىپ، ەلدەر اراسىنداعى تۇراقتىلىق پەن ءوزارا سەنىمدى نىعايتۋعا ىقپال ەتەدى.
